बेल्जियममा नै अस्ताए कलाकार उज्ज्वल केसी
बार्सिलोना । बेल्जियम निवासी कलाकार उज्ज्वल केसीको निधन भएको छ । ५४ वर्षीय केसीको शनिबार निधन भएको हो ।
पारिवारिक स्रोतका अनुसार उनको हृदयघातबाट बेल्जियमस्थित निवासमा नै निधन भएको हो ।
ललितपुरको महालक्ष्मी नगरपालिका इमाडोल मूल घर भएका केसी दुई दशकदेखि बेल्जियममा परिवारसँगै बस्दै आएका थिए ।
उनको परिवारमा श्रीमती र दुई छोरी रहेका छन् । पारिवारिक स्रोतका अनुसार दिवंगत केसीको अन्त्येष्टि बुधबार बेल्जियममै गरिनेछ ।
केसी नेपाल चलचित्र कलाकार संघका सदस्य समेत थिए । दर्जनौं म्युजिक भिडियोमा निर्देशन गरेका उज्ज्वल युरोपमा बसेर पनि नेपाली कला क्षेत्रमा सक्रिय थिए ।
उनले केही नेपाली चलचित्रमा अभिनयसमेत गरेका छन् । नेपाली सिनेजगतमा उदाउँदै गर्दा नायिका श्रीषा कार्कीसँग त्यतिबेला उज्ज्वलले चलचित्र ‘फुटपाथमा सँगै काम गरेका थिए । उनले नेपाल टेलिभिजनमा ‘दि भोइस’ नामको पनि कार्यक्रम संचालन गरेका थिए ।
