ब्राजिलमा बाढीको कहरः ५५ जनाको मृत्यु, ७४ बेपत्ता
ब्राजिलको दक्षिणी क्षेत्रमा बाढीको कारण हालसम्म कम्तिमा ५५ जनाको मृत्यु भएको छ । उक्त प्रकोपमा परी ७४ जना बेपत्ता भएका छन् ।
शनिबार आएको तुफानपछि २५ हजारभन्दा बढी मानिसहरू आफ्नो घर छाड्न बाध्य भएको स्थानीय सरकारलाई उद्धृत गर्दै बीबीसीले जनाएको छ । उक्त क्षेत्रमा थप पानी पर्ने अनुमान गरिएको पनि बीबीसीले समाचारमा उल्लेख गरेको छ ।
यो प्रकोपमा परेका करिब ५ लाख मानिसहरूले पानी र बिजुलीको अभावमा गुजारा गर्न बाध्य भएका छन् । बाढीका कारण करिब २५० शहर प्रभावित भएका छन् । हावाहुरीका कारण केही सडक पनि भत्किएका छन् ।
त्यस्तै एक बाँध फुट्दा कम्तिमा ३० जनाको मृत्यु भएको छ । स्थानीय प्रशासनले अर्को बाँध पनि फुट्ने जोखिम रहेको जनाएको छ । त्यस्तै पोर्टो एलेग्रेमा अन्तर्राष्ट्रिय उडान बन्द गरिएको छ ।
– एजेन्सी
