गुल्मीमा पहिरो, एकै परिवारका ५ जनाको मृत्यु
गुल्मी : गुल्मीमा राति आएको पहिरोमा घर पुरिँदा एकै परिवारका पाँच जनाको मृत्यु भएको छ । मालिका गाउँपालिका–६ अर्जेको कँडेलपाटामा पहिरोले भेषबहादुर विकको घर पुरिँएको हो। पहिरोमा ५ जनाको मृत्यु भएको जिल्ला प्रहरी कार्यालय गुल्मीले जनाएको छ।
पहिरोमा परी ५६ वर्षीय भेषबहादुर विक, उनकी श्रीमती ४७ वर्षीया सुन्तली, बुहारी ३० वर्षीया सीता बिक, ७ वर्षीया सपना विक र २ वर्षीया विपना बिकको मृत्यु भएको हो।
घरमा माथिबाट ढुङ्गा,माटो सहितको पहिरो आई घर पूर्णरुपमा पुरिएको थियो। स्थानीय र प्रहरीले मृतकहरुलाई पहिरोबाट निकालेका हुन्।
