स्याङ्जामा पहिरोले घर पुरिँदा आमा छोरीको मृत्यु
स्याङ्जा : स्याङ्जामा पहिरोले घर पुरिँदा आमा–छोरीको मृत्यु भएको छ। गए राति स्याङ्जाको फेदीखोला गाउँपालिका–५ बांगेमा पहिरोले घर पुरिँदा उनीहरुको मृत्यु भएको हो।
पहिरोमा परेर आमा ३१ वर्षीया दुर्गा जिटी र उनकी तीन वर्षीया छोरी निकिसाको मृत्यु भएको घटनास्थलमा रहेका प्रहरी सहायक निरीक्षक अमृत भुजेलले जानकारी दिए। ‘राति सुतेका वेला पहिरो खसेको हो,’ उनले भने। घटनाका वेला आमा र छोरी मात्र घरमा रहेका र छोरो गाउँमा आफन्तकहाँ वास बस्न गएकाले उनको ज्यान जोगिएको उनले बताए।
पहिरोले ढुंगामाटो र जस्तापाताले छाएको एकतले घर र घरनजिकै रहेको गोठ पुरिएको छ। पहिरोमा परी एउटा भैँसी पनि मरेको प्रहरीले जनाएको छ।
