बङ्गलादेशमा भएको हिंसाको निन्दा गर्दै ईयूले भन्यो– विद्यार्थीमाथि बल प्रयोग भयो

ब्रसेल्स–बङ्गलादेशमा कम्तीमा २०६ जनाको ज्यान जाने गरी भएको हिंसालाई लिएर युरोपेली सङ्घ (ईयू)ले आपत्ति जनाएको छ । ईयूका विदेश नीति प्रमुख जोसेप बोरेलले बङ्गलादेशमा प्रदर्शनकारीहरूविरुद्ध ‘अत्यधिक’ बल प्रयोग भएको भन्दै मङ्गलवार निन्दा गरेका छन् ।

यस महिना सरकारी सेवामा आरक्षण प्रणालीको विरोधमा भएको विद्यार्थीहरूको प्रदर्शनले हिंसात्मक रुप लिएको थियो । प्रहरी र अस्पतालको तथ्याङ्कअनुसार घटनामा प्रहरी अधिकारीहरूको पनि ज्यान गएको छ ।

बोरेलले बङ्गलादेशको हिंसाले निम्त्याएको मृत्यु, यातना,  सामूहिक गिरफ्तारी र सम्पत्तिको क्षतिप्रति गहिरो चिन्ता व्यक्त गरेका छन् । उनले अनुसन्धान गर्न र जिम्मेवारलाई न्यायको कठघरामा ल्याउन आह्वान पनि गरेका छन् ।

‘कानून प्रवर्तन अधिकारीहरू प्रदर्शनकारी र अन्यविरुद्ध अत्यधिक र घातक बल प्रयोग गरेका थुप्रै उदाहरणका लागि पूर्ण जवाफदेही हुनुपर्छ,’ उनले एक विज्ञप्तिमार्फत भनेका छन्, ‘हामी यस सङ्कटको समयमा जिम्मेवार अधिकारीका कार्यहरू नजिकबाट पछ्याइरहेका छौँ । ईयू–बङ्गलादेश सम्बन्धको आधारभूत कुरालाई ध्यानमा राख्दै सबै मानवअधिकारको पूर्णसम्मान हुने अपेक्षा गर्दछौं ।’

प्रधानमन्त्री शेख हसिनाको १५  वर्षको कार्यकालमा भएकामध्ये यो सबैभन्दा घातक झडपको घटना भएको बताइएको छ । उनको सरकारले विद्यार्थीविरुद्ध गिरफ्तारी, सेना परिचालन र राष्ट्रव्यापी इन्टरनेट कटौतीजस्ता विभिन्न तरिका अपनाएको छ । यसको विश्वभर आलोचना भइरहेको छ ।