बेँसीसहर–चामे सडक फेरि अवरुद्ध
लमजुङ- पहिरो खसेपछि बेँसीसहर–चामे सडक आज बिहानदेखि फेरि अवरुद्ध भएको छ।
गए रातिदेखि परेको निरन्तरको वर्षाले यस सडकअन्तर्गत लमजुङको बेँसीसहर नगरपालिका–६ खरखरे भिरमा आज बिहान पहिरो खसेर सडक अवरुद्ध भएको जिल्ला प्रहरी कार्यालय लमजुङले जनाएको छ।
प्रहरी निरीक्षक थानेश्वर चपाईँका अनुसार केही वर्षअघि पनि पटकपटक पहिरो खसेको स्थानमा आज बिहान फेरि पहिरो खसेको हो।
पहिरो खसेको स्थानभन्दा मुनि मस्र्याङ्दी नदी छ। भौगोलिक रुपमा पहिरो खसेको ठाउँ अत्यन्तै जोखिमपूर्ण छ।
सडक अवरुद्ध हुँदा मनाङ र लमजुङको उत्तरी क्षेत्रका स्थानीयलाई समस्या भएको छ। बेँसीसहर चाँमे सडक वर्षात् सुरु भएपछि पटकपटक अवरुद्ध हुँदै आएको छ।
