बंगलादेश छाडेर भारत गइन् प्रधानमन्त्री हसिना, सेना प्रमुखद्वारा अन्तरिम सरकार बनाउने घोषणा

ढाका : बंगलादेशका सेना प्रमुख जनरल वकारले राष्ट्रका नाममा सम्बोधन गर्दै देशमा अन्तरिम सरकार गठन हुने बताएका छन् । यसका लागि उनले विभिन्न दलसँग कुराकानी पनि गरेका छन् ।

शेख हसिना बंगलादेशको प्रधानमन्त्री पद त्यागेर भारतको अगरतला सहर गएकी छिन् ।

राष्ट्रका नाममा सम्बोधन गर्दै प्रधानसेनापतिले जनतालाई शान्ति कायम राख्न अपिल गरेका छन् । सेना प्रमुखले बंगलादेशको आन्दोलनमा मारिएकालाई न्याय दिने आश्वासन दिएका छन् ।

बंगलादेशी विद्यार्थीहरूले शेख हसिनाविरुद्ध गत महिनादेखि प्रदर्शन गरिरहेका थिए। देशका उच्च सरकारी पदमा रहेको आरक्षण खारेज गर्नुपर्ने उनीहरुको माग छ ।

यो आन्दोलन निकै हिंसात्मक बनेको थियो, जसमा अहिलेसम्म करिब ३०० जनाको मृत्यु भइसकेको छ । विद्यार्थी शेख हसिनाको राजिनामाको मागमा अडिग थिए ।

हसिना सन् २००९ देखि बंगलादेशकी प्रधानमन्त्री थिइन् ।

बंगलादेशमा केही प्रदर्शनकारीहरू ढाकास्थित प्रधानमन्त्रीको सरकारी निवासमा प्रवेश गरेको देखिएको छ भने हजारौं विद्यार्थीले प्रधानमन्त्रीको निवासमा ढुंगा हानेका छन् ।