ब्राजिलमा एक्स (ट्वीटर) प्रतिबन्ध
न्युयोर्क – सामाजिक सञ्जाल एक्स (ट्वीटर)लाई ब्राजिलमा प्रतिबन्ध लगाइएको छ । सर्वोच्च अदालतका न्यायाधीशले नयाँ कानूनी प्रतिनिधि नियुक्त गर्नको लागि दिएको समयसीमा पूरा नगरेपछि एक्सलाई प्रतिवन्ध लगाउन आदेश दिएका थिए ।
न्यायधीश एलेक्साण्ड्रे दे मोरेसले सोसल मिडिया प्लेटफर्मलाई प्रतिवन्ध लगाउन आदेश दिएका हुन् । एलन मक्सको एक्सले ब्राजिलमा गतल सूचनाहरु सम्प्रेषण गरेको भन्दै गत अप्रिलदेखि विवाद भएको थियो । २० करोड जनसंख्या भएको ब्राजिलमा दुई करोड बढीले एक्सको प्रयोग गर्छन् ।
ब्राजिल सरकारसँग विवाद बढ्दै गएपछि एक्सले त्यहाँ रहेको आफ्नो कार्यालय बन्द गरेको थियो । न्यायाधीश मोरेसले एप्पल र गुगल जस्ता कम्पनीहरूलाई एक्सलाई आफ्नो स्टोरबाट हटाउन र आइओएस र एन्ड्रोइड प्रणालीमा यसको प्रयोग ब्लक गर्न पाँच दिनको समय सीमा दिएका छन् ।
न्यायाधीश मोरेसले गलत सूचना फैलाएको आरोपमा पूर्व दक्षिणपन्थी राष्ट्रपति जाइर बोल्सोनारोका समर्थकका एक्स खाताहरूलाई ब्लक गर्न आदेश दिएका थिए । उनले कम्पनीका कानूनी प्रतिनिधिहरूलाई कुनै पनि खाताहरू पुनः सक्रिय भएमा जिम्मेवार ठहरिने चेतावनी दिएका थिए ।
ब्राजिलको दूरसञ्चार एजेन्सीका प्रमुखले पनि एक्स प्लेटफर्म निलम्बन गर्न आदेश दिइएको पुष्टि गर्दै आदेश पालनाको काम अघि बढेको बताएको रोयटर्सले जनाएको छ । उनले भीपीएन प्रयोग गरेर एक्समा खोलेमा प्लेटफर्मको पहुँच गर्न खोज्नेहरुलाई ब्राजिलियन रियल ५० हजार (नेपाली झण्डै १२ लाख) जरिवाना तिर्नुपर्ने चेतावनी पनि दिएका छन् ।
न्यायाधीशको आदेश अनुसार, एक्सले देशमा नयाँ कानूनी प्रतिनिधि नियुक्त नगर्दासम्म र ब्राजिलको कानून उल्लंघन गरेको कारण लागेका जरिवानाहरू नतिरेसम्म प्रतिबन्ध लागू हुनेछ ।
