राष्ट्रपति बहसमा ट्रम्पले भनेआप्रवासीहरूले घरपालुवा कुकुर खान्छन्
वाशिङटन डीसी । अमेरिकामा राष्ट्रपति पदको बहसमा रिपब्लिकन पार्टीका उम्मेदवार डोनाल्ड ट्रम्पले आप्रवासीहरूमाथि संघीन आरोप लगाए । रोचक कुरा चाँहि के भने वार्ताका मध्यस्थकर्ता स्वयंले ट्रम्पको सो आरोपलाई गलत बताए ।
आप्रवासीहरूले घरपालुवा जनावर खान्छन् भनेर ट्रम्पले बेतुकको आरोप लगाएका थिए । ‘उनीहरूले घरपालुवा कुकुरहरू खान्छन्, ती मानिसहरू घरपालुवा जनावरहरू खान्छन् ,’ ट्रम्पले भने ।
उनको यो भनाइको जवाफमा बहसका एक मध्यस्थकर्ता डेभिड मुइरले स्प्रिङफिल्डका सहर प्रबन्धकले त्यस्तो कुनै प्रमाण नभएको बताएका थिए । ‘मैले टिभीमा मानिसहरूले आफ्नो कुकुर चोरेर खाएको भनेर भनेको सुनेको छु’ ट्रम्पले भनेका थिए ।
यसको जवाफमा कमला ह्यारिसले ट्रम्पले निकै बढाइचढाइ गरेर कुरा गरेको बताइन् । यस्तो वास्तवमा भएको थियो भन्ने कुनै विश्वसनीय रिपोर्ट नभएको स्प्रिङफिल्डका अधिकारीहरूले बीबीसीलाई पुष्टि गरेका थिए ।
