आईसीसी विश्वकप लिग–२ अन्तर्गत नेपालले सोमबार क्यानडाको सामना गर्दै

आईसीसी विश्वकप लिग–२ अन्तर्गत नेपालले दोस्रो शृङ्खलाको पहिलो खेलमा सोमबार क्यानडाको सामना गर्दै छ । खेल क्यानडाकाे किंग्स सिटी ओरान्टियोमा नेपाली समयअनुसार बेलुका पाैने ८ बजे सुरु हुनेछ । यो शृङ्खलामा नेपाल र क्यानडासँगै ओमानसमेत रहेको छ । समग्रमा जारी लिग–२ को यो छैटौं शृङ्खला हो ।

क्यानडा भ्रमणमा नेपालले ४ वटा खेल खेल्नेछ । नेपालले पहिलो खेलमा सोमबार १६ सेप्टेम्बरमा क्यानडासँग, १८ सेप्टेम्बरमा ओमानसँग, २२ सेप्टेम्बरमा क्यानडासँग र २४ सेप्टेम्बरमा ओमानसँग खेल्नेछ । एक दिवसीय शृङ्खलापछि यिनै ३ राष्ट्रबीच टी–२० शृङ्खला हुनेछ ।

क्यानडासँगको एक दिवसीय खेललाई फर्किएर हेर्ने हो भने नेपाल भारी देखिन्छ । नेपालले गत फेब्रुअरीको पहिलो शृङ्खला अघि क्यानडासँग ३ एक दिवसीय शृङख्ला खेलेको थियो । जसमा तीनवटै खेलमा नेपाल विजयी भएको थियो ।

तर पछिल्लो समय सुधारिएको प्रदर्शन गरेको क्यानडालाई कमजोर ठान्ने गल्ती नेपालले गर्नेछैन । पहिलो शृङ्खलाका ४ वटै खेल जितेको क्यानडाले नेदरल्याण्ड्स र अमेरिकासँगको शृङ्खलामा भने ४ वटै खेल हारेको थियो । त्यसैले घरेलु मैदानमा हुन लागेको शृङ्खला क्यानडाका लागि पनि महत्वपूर्ण छ ।

नेपाल र ओमानबीच भने पछिल्ला ७ एक दिवसीय खेलमध्ये ओमानले ४ खेल जितेको छ भने नेपालले ३ खेल आफ्नो पक्षमा पारेको छ ।

नेपालले सेप्टेम्बरको यो शृङ्खलालगत्तै अक्टोबरमा अमेरिका र स्कटल्याण्डसँग तेस्रो शृङ्खला खेल्नेछ । क्यानडा र अमेरिकी टोलीमा केही प्रभावशाली भारतीय मूलका खेलाडीहरू छन् ।

क्यानडाका प्रगत सिंह, श्रेयस मोभ्भा, हर्ष ठाकेरजस्ता खेलाडीलाई बेलैमा पभेलियनको बाटो देखाउन सके नेपाललाई सहज हुनेछ । नेपालका लागि ओपनर कुशल भुर्तेल र आशिफ शेखसँगै अनिल साह, कप्तान रोहित पौडेल, दीपेन्द्रसिंह ऐरी र बलिङतर्फ सन्दीप लामिछानेसँग टोलीले आशा राख्नेछ ।

यी दुई शृङ्खला सकिँदा नेपालले आफ्ना ३६ मध्ये १२ खेल खेलिसक्ने छ । गत फेब्रुअरीमा घरेलु मैदानमा नेदरल्याण्ड्स र नामिबियासँग खेलेको पहिलो शृङ्खलामा निराशाजनक नतिजाको सामना गरेको नेपाललाई २०२७ को एक दिवसीय विश्वकप छनोटमा सहभागिता जनाउन पनि यी दुई शृङ्खला निकै महत्वपूर्ण छन् ।

लिगमा ४ खेल खेलेको नेपाल २ अंकसहित तालिकाको ७औं स्थानमा छ । घरेलु मैदानमा पहिलो शृङ्खला सोचेजस्ता राम्रो नभएपछि ८ राष्ट्र सम्मिलित लिगमा शीर्ष ४ भित्र अटाउन नेपालले यी दुई शृङ्खलामा उत्कृष्ट खेल प्रस्तुत गर्नुपर्नेछ । लिग २ तालिकामा अघिल्लो ८ मध्ये ६ खेल जितेको नेदरल्याण्ड्स शीर्ष स्थानमा छ ।

लिग–२ प्रतियोगिताको शीर्ष ४ मा पर्ने राष्ट्रले सन् २०२७ को विश्वकप छनोटमा सिधै प्रवेश पाउनेछ भने अन्तिम ४ टोलीले भने क्वालिफायर प्लेअफ खेल्नुर्नेछ । नेपालले सन् २०१८ मा पाएको एक दिवसीय मान्यता जोगाउन पनि यो प्रतियोगिता महत्वपूर्ण हुनेछ ।

लिग–२ मा स्कटल्याण्ड, नेदरल्याण्ड्स, नामिबिया, ओमान, अमेरिका र यूएईजस्ता टिम रहेकाले नेपालले एक दिवसीय मान्यता जोगाउन र विश्वकप छनोटमा पुग्न पनि स्तरीय प्रदर्शन गर्नुपर्नेछ ।

नेपाल क्रिकेट संघ (क्यान) ले सिरिजका लागि खेलाडी बिदाइ गर्दा प्रशिक्षक मोन्टी देसाईले तयारी राम्रो भएको बताएका थिए । यसै शृङ्खलाका लागि नेपालले भारतको बैंग्लोर र श्रीलंकामा अभ्यास गरेको थियो ।

टोलीका दुई प्रमुख खेलाडी कप्तान रोहित कुमार पौडेल र दीपेन्द्रसिंह ऐरी भने क्यानडामा नै भएको ग्लोबल टी–२० लिगपछि त्यही प्रशिक्षण गरिरहेका थिए । यो शृङ्खलामा लेग स्पिनर सन्दीप लामिछानेको पुनरागमनले टोली थप उत्साहित छ ।

नेपाली टोलीमा कप्तान रोहित पौडेल, कुशल भुर्तेल, आशिफ शेख, अनिल साह, भीम सार्की, आरिफ शेख, कुशल मल्ल, दीपेन्द्र सिंह ऐरी छन् ।

यस्तै अर्जुन साउद, सोमपाल कामी, करण केसी, गुल्सन झा, रिजन ढकाल, सन्दीप लामिछाने र ललित राजवंशी पनि टिममा समेटिएका छन् । देव खनाललाई रिजर्भ खेलाडीका रुपमा टोलीमा राखिएको छ ।