च्याम्पियन्स लिगमा आज बार्यन र बार्सिलोना भिड्दै

न्युयोर्क- युइएफए च्याम्पियन्स लिगमा आज राति जर्मन क्लब बार्यन म्युनिख र स्पेनिस क्लब बार्सिलोना आमने सामने हुँदै छन्। बार्सिलोनामा हुने खेल नेपाली समय अनुसार राति पौने १ बजे सुरु हुने छ।

बार्सिलोनाले आफ्नो उत्कृष्ट लय फेला पारेको भए पनि च्याम्पियन्स लिगमा बायर्न म्युनिखको सामना गर्दा उनीहरूलाई कठिनाइ हुने गरेको छ। यी दुई टोली पछिल्लो पटक धेरै पटक आमने-सामने भएका छन्, जहाँ जर्मन टोली सधैं बलियो देखिएको छ। बायर्नले बार्सिलोनालाई लगातार हराउँदै आफ्नो कीर्तिमानमा थप सुधार गरेको छ। तर, अब ‘कुलेस’ले यसलाई परिवर्तन गर्न चाहन्छन्।

बार्सिलोना र बायर्न म्युनिख अहिलेसम्म १५ पटक एकअर्कासँग भिडिसकेका छन्। तीमध्ये ११ खेलमा बायर्नले जित हात पारेको छ भने बार्सिलोनाले २ पटक मात्रै जित्न सकेको छ। बाँकी २ खेल बराबरीमा टुंगिएका छन्।

यी दुई टोलीबीचको पहिलो भेट १९९६ मा युएफा कपको सेमिफाइनलमा भएको थियो। गार्डिओला र फिगो बार्सिलोनाको तर्फबाट मैदानमा थिए भने माथाउस र काहन बायर्नको तर्फबाट खेलेका थिए। पहिलो खेल जर्मनीमा २-२ को बराबरीमा सकियो तर क्याम्प नोउमा भएको दोस्रो खेल बायर्नले १-२ ले जितेको थियो। त्यसपछि, यी दुई टोलीबीच भएका सबै खेलहरू च्याम्पियन्स लिगमा मात्रै भएका छन्।

बार्सिलोनाले बायर्नविरुद्ध आफ्नो पहिलो जित सन् २००९ मा पाएको थियो, जब तात्कालीन प्रशिक्षक पेप गार्डिओलाको नेतृत्वमा क्याम्प नोउमा भएको खेलमा बार्सिलोनाले ४-० को शानदार जित हात पारेको थियो। खेलमा लियोनेल मेस्सीले दुई गोल गरे भने सामुएल एटो र थिएरी हेनरीले थप दुई गोल गरी बार्सिलोनालाई विजय दिलाए।

तर, त्यसपछि भएको खेलहरू बार्सिलोनाका लागि निराशाजनक रहे। २०१२-१३ सिजनमा बायर्नले पहिलो लेगमा ४-० र दोस्रो लेगमा ३-० को जित दर्ता गर्दै बार्सिलोनालाई पूर्ण रूपमा पराजित गरेको थियो। त्यही सिजन बायर्नले च्याम्पियन्स लिगको उपाधि पनि जितेको थियो।

२०१५ को सेमिफाइनलमा बार्सिलोना र बायर्न फेरि आमने-सामने भए। बार्सिलोनाको प्रशिक्षक लुइस एनरिक थिए भने बायर्नको जिम्मेवारी पेप गार्डिओलाले लिएका थिए। क्याम्प नोउमा भएको पहिलो लेगमा बार्सिलोनाले ३-० को जित दर्ता गर्यो, जसमा लियोनेल मेस्सीले दुई गोल गरे। बायर्नले दोस्रो लेगमा ३-२ को जित हासिल गरे पनि समग्रमा बार्सिलोनाले अन्तिममा आफ्नो स्थान सुरक्षित गर्यो।

तर त्यसपछि, बायर्न म्युनिख बार्सिलोनाका लागि प्रमुख चुनौती बन्यो। बार्सिलोनाको २-२-५ को कीर्तिमान, जुन पहिले केही हदसम्म सन्तुलित थियो, हाल २-२-११ मा पुगेको छ। पछिल्लो ६ खेलमा बायर्नले बार्सिलोनालाई निरन्तर हराउँदै आएको छ, तीमध्ये केही खेलहरू अत्यन्तै प्रभावशाली रहेका छन्।