गैरआवासीय नेपाली संघले एनआरएन ग्लोबल कन्क्लेभ–२०२४ आयोजना गर्ने
काठमाडौं- गैरआवासीय नेपाली संघले कार्तिक ११ र १२ गते काठमाडौंमा एनआरएन ग्लोबल कन्क्लेभ–२०२४ आयोजना गर्ने भएको छ ।
संघले शुक्रबार काठमाडौंमा पत्रकार सम्मेलन गर्दै रुपान्तरण र एकताःश्रम, लगानी र नागरिकताको निरन्तरता भन्ने नाराका साथ काठमाडौंमा एनआरएन ग्लोबल कन्क्लेभ आयोजना गर्न लागेको जानकारी दिएको हो ।
कन्क्लेभमा ७ वटा प्लेनरी सत्र रहने र स्वदेश तथा विदेशका पाँच सय भन्दा बढि व्यक्तिहरुको सहभागीता रहने संघले जनाएको छ ।
कन्क्लेभको पहिलो दिन नेपालमा आर्थिक रुपान्तरणका लागि पूर्वाधार निर्माण, गैरआवासीय नेपाली नागरिकता, मताधिकार र गोर्खा, जलवायु परिवर्तनले महिला तथा बालबालिकामा पार्ने प्रभाव लगाएतका बिषयमा छलफल हुने अध्यक्ष बद्री केसीले जानकारी दिए।
त्यस्तै दोश्रो दिन राष्ट्र निर्माणका लागि प्रवासी युवाहरूको सशक्तीकरण, सुरक्षित, व्यवस्थित र सम्मानजनक वैदेशिक रोजगारीको सुनिश्चितता एवं सामाजिक सुरक्षा लगाएतमा संघको भूमिका लगाएतका बिषयमा छलफल हुने छ । संघका अध्यक्ष केसीले जलवायु परिवर्तनले देखिएको विनासका कारणका बारेमा छुट्टै सेसनमा छलफल हुने जानकारी दिए।
उनले नेपालमा जुनसुकै विपद् पर्दा संघले साथ र सहयोग गरेको भन्दै हालैको बाढिपहिरोपछि पनि ४४ भन्दा बढि जिल्लामा ९५ लाख बराबरको राहत बाँडेको बताए। संघमा लोकतान्त्रीक मूल्यमान्यता अनुसार भएको निर्वाचनको परिणाम चित्त नबुझाएर सडकबाटै आफुलाई अध्यक्ष घोषणा गरेको देखिएको भन्दै अध्यक्ष केसीले बैधानिक निकासका लागि संघ तयार रहेको जिकिर गरे।
उहाले संस्था सञ्चालन गर्ने विधानमा समस्या देखिए आवश्यकताअनुसार परिमार्जन गर्न तयार रहेको धारणा राखेका थिए।
उनले एकबर्षअघिसम्म १ खर्बभन्दा बढि गैर आवासिय नेपालीको लगानी नेपालमा रहेको र अहिले लगानीको थप वातावरण हुँदै गएकाले थप लगानी बढ्ने उल्लेख गरे। त्यस्तै ग्लोबल कन्क्लेभका क्रममा १० अर्बको एनआरएन डेभलप्मेन्ट फन्डको सञ्चालनका लागि भइरहेको तयारीबारे सरकारका प्रतिनिधिसंग पनि छलफल हुने आयोजकले जनाएको छ ।
