साउदी अरेबियामा चार दिन अस्पताल भर्ना भइन् रोनाल्डोकी प्रेमिका जर्जिना
न्युयोर्क- विश्वप्रसिद्ध फूटबलर क्रिस्टियानो रोनाल्डोकी प्रेमिका जर्जिना रोड्रिगेजले आफ्नो निजी जीवनको एक संवेदनशील पक्ष सार्वजनिक गरेकी छिन् । उनको सामाजिक सञ्जालमा हालै पोस्ट गरेको तस्वीरमा उनलाई अस्पतालमा भएको देख्न सकिन्छ ।
जहाँ उनी बिरामी भई चार दिनसम्म उपचाररत थिइन् । तस्वीरमा उनलाई फूलको गुच्छा छेउमा काम गरिरहेको देख्न सकिन्छ, जुन रोनाल्डोका छोरा क्रिस्टियानो जुनियरले पठाएका थिए । जर्जिनाको हातमा हालैको स्वास्थ्य समस्याका कारण आईभी राखिएको थियो ।
‘अन्ततः घर फर्किएँ ! चार दिनसम्म निमोनियाको उपचारका लागि अस्पतालमा रहनु पर्यो । अहिले म घरमा आराम गरिरहेकी छु र परिवारसँगै छु,’ उनले भनेकी छिन् । साथै उनले राम्रो उपचार पाएको भन्दै साउदी-जर्मन हेल्थ अस्पतालप्रति आभार व्यक्त गरेकी छिन् ।
अब जर्जिनाले केहीदिन घरमै आराम गर्दै क्रिस्टियानो जुनियर, एभा, माटेओ, अलाना मार्टिना र बेला एस्मेराल्डा गरी पाँच बच्चासँग समय बिताउने छिन् । चिकित्सकहरूले पूर्ण स्वास्थ्य लाभका लागि आराम, औषधि सेवन, र शरीरलाई पर्याप्त पानी पुर्याउनुपर्ने सल्लाह दिएका छन् ।
साथै, श्वासप्रश्वास र फोक्सोको अक्सिजन प्रवाह सुधार गर्न गहिरो श्वासप्रश्वासका व्यायाम पनि गर्न उपयोगी हुने बताइएको छ । रोग प्रतिरोधात्मक क्षमता कमजोर भएको हुनाले उनलाई संक्रमणबाट जोगिन सावधानी अपनाउन भनिएको छ ।
जर्जिना सन् २०१६ देखि रोनाल्डोसँगको सम्बन्धमा छिन् । उनीहरूले बच्चा जन्माइसकेको भए पनि विवाह गरेका भने छैनन् ।
पोर्चुगिज फूटबलर रोनाल्डो हाल साउदी अरेबियाको अल नासर क्लबबाट व्यावसायिक फूटबल खेल्छन् ।
