स्पेनमा बाढीबाट मृत्यु हुनेको सङ्ख्या दुई सय नाघ्यो
स्पेन: बुधबारदेखि आएको स्पेनको सबैभन्दा ठुलो बाढीमा मृत्यु हुनेहरूको सङ्ख्या शुक्रबार दुई सय पाँच पुगेको छ। सरकारले बाँच्नेहरूको खोजीका लागि थप सैनिक परिचालन गरेको छ।
मङ्गलबारदेखि आएको बाढीले सवारी साधन बगाउने, पुल भत्काउने र सहरहरूलाई फोहरमा डुबाउँदा स्पेनमा दशकौँदेखि सबैभन्दा ठुलो विनाशकारी बाढी आएको हो ।
सबैभन्दा धेरै प्रभावित पूर्वी भ्यालेन्सिया क्षेत्रमा आपत्कालीन सेवा समन्वय गर्ने संस्थाले त्यस क्षेत्रमा मात्र दुई सय दुई जनाको मृत्यु पुष्टि गरेको छ। छिमेकी काष्टिला–ला मान्चा र अन्दालुसिया क्षेत्रका अधिकारीहरूले पहिले नै तीन जनाको मृत्युको घोषणा गरिसकेका छन्।
ड्रोन र कुकुरहरू सहित उद्धारकर्ताहरू पानीमा हिँड्दै र भग्नावशेषमा मलबामा खोजी गर्दै छन्। सरकारी अधिकारीहरूका अनुसार अझै धेरै व्यक्तिहरू बेपत्ता छन्।
सरकारले पहिले नै एक हजार दुई सय सैनिक परिचालन गरिसकेको अवस्थामा अर्को पाँच सय सैनिक थप गर्न लागेको छ। बाढी सुरु भएको तीन दिनसम्म केही क्षेत्रहरू खानेपानी, खाद्यान्न र बिजुलीबाट वञ्चित छन्। धेरै सडक र रेल मार्गहरू अझै पनि अवरुद्ध हुँदा मृत्यु सङ्ख्या बढ्ने डर छ।
चिभा सहरकी मेयर अम्पारो फोर्टले सार्वजनिक रेडियोलाई भने, “औद्योगिक क्षेत्रमा अझै पनि गाडीहरूको थुप्रो छ। धेरै गाडी खाली होलान् तर केहीमा मानिसहरू छन् भन्नेमा हामी निश्चित छौँ।”
राष्ट्रिय मौसम सेवा एइमेटका अनुसार भ्यालेन्सिया सहर पश्चिमतर्फको चिभा सहरमा मङ्गलबार मात्र आठ घण्टामा चार सय ९१ मिमी वर्षा भयो। यो करिब एक वर्षको वर्षासँग बराबर हुन्छ।
