बेलायतमा धेरै चिनी भएका खाद्य पदार्थहरूमा दिउँसो टिभी विज्ञापनमाथि प्रतिबन्ध
बेलायत सरकारले बालबालिकाको मोटोपना विरुद्धको लडाइँमा ग्रानोला र मफिन जस्ता चिनीयुक्त खानाहरूका लागि दिनको समयमा टिभी विज्ञापनमा प्रतिबन्ध लगाउँदै तिनीहरूलाई जङ्क फूड (पत्रु खाना) भनेर चिनाएको छ ।
मङ्गलबार सार्वजनिक गरिएको कदमअनुसार ‘कम स्वस्थ’ खाद्य पदार्थ र पेयपदार्थका विज्ञापनहरू अर्को वर्ष अक्टोबरदेखि राति ९ बजेपछि मात्र प्रसारण गर्न पाइनेछ ।
राष्ट्रिय स्वास्थ्य सेवाका अनुसार बेलायती बालबालिकामा मोटोपना बढ्दै गएको छ र १० मध्ये एक चार वर्षका बालबालिकालाई अहिले मोटो मानिन्छ । पाँचमध्ये एक जना पाँच वर्षका बालबालिकामा धेरै चिनी खाँदा दाँत क्षय हुने समस्या छ ।
सरकारको सूचीमा प्रत्येक खाद्य पदार्थको चीनी, बोसो र नुनको मात्रा हेरेर स्कोर गरिएका क्रोइसेन्ट, प्यानकेक र वेफल जस्ता प्याक गरिएका चिनी बढी भएका नास्ताका खाद्य पदार्थहरू पनि समावेश छन् ।
“खानका लागि तयार अन्न, ग्रानोला, मुसली, दलिया ओट्स र अन्य जौमा आधारित अन्नहरू सहित बिहानको खाजा अनाजहरू समावेश गरिएको छ”, सरकारले भन्यो ।
प्रतिबन्धित सूचीमा चना वा दालमा आधारित क्रिस्प, समुद्री शैवालमा आधारित स्न्याक र बम्बे मिक्सका साथै ऊर्जा पेय, ह्याम्बर्गर र चिकन नगेट्स जस्ता उत्पादनहरू पनि छन् ।
तर नयाँ प्रतिबन्धहरू प्राकृतिक दलिया ओट्स र चिनीबिनाको दही जस्ता स्वस्थ विकल्पहरूमा लागू हुने छैनन् ।
सरकारले नयाँ उपायहरूले एक वर्षमा बाल्यकालको मोटोपनाका करिब २० हजार मामिला रोक्न मद्दत गर्न सक्ने आशा गरेको छ ।
“मोटोपनाले हाम्रा बालबालिकालाई जीवनको सर्वोत्तम सुरुआत दिन रोक्छ, तिनीहरूलाई जीवनभर स्वास्थ्य समस्याहरू निम्त्याउँछ र एनएचएसलाई अर्बौं पाउँड खर्च गर्न बाध्य पार्छ”, स्वास्थ्यमन्त्री वेस स्ट्रीटिङले भने, “यो सरकार अहिले टिभी र अनलाइन दुवैमा बालबालिकालाई लक्षित जङ्क फुड विज्ञापनहरूलाई रोक्ने कार्य गर्दैछ ।”
