अमेरिकाको लस एन्जलसमा व्यापक आगलागी, हालसम्म ११ जनाको मृत्यु
न्यूयोर्क : अमेरिकाको लस एन्जलसमा भएको आगलागीमा परी हालसम्म ११ जनाको मृत्यु भएको छ। लस एन्जलस काउन्टी मेडिकल परीक्षकले यो पुष्टि गरेका हुन्।
पालिसेड्स आगलागीमा ५ जना र इटन आगलागीमा ६ जनाको मृत्यु भएको जनाइएको छ।
यसैबीच, राष्ट्रपति जो बाइडेनले दक्षिणी क्यालिफोर्नियामा ‘जीवन र सम्पत्तिको सुरक्षा’ गर्न आगामी छ महिनाको खर्च संघीय सरकारले बेहोर्ने घोषणा गरेका छन्।
लस एन्जलस काउन्टी मेडिकल परीक्षकले आगलागीमा मृत्यु भएका व्यक्तिहरूको पहिचान भइरहेको बताएका छ।
मृतकमध्ये हालसम्म तीनजनाको पहिचान भएको र अन्यको पहिचान गर्न केही समय लाग्ने जनाइएको छ।
क्यालिफोर्नियामा आगलागीले विशाल रुप धारण गरेको छ। लस एन्जलसका जंगलबाट सुरु भएको आगो अहिले त्यहाँका पाँच क्षेत्रमा फैलिएको छ। आगो नियन्त्रण गर्न अग्निनियन्त्रकहरू अथक प्रयास गरिरहेका छन्। हावाको वेग र आगोको विशाल फैलावटले अग्निनियन्त्रकहरुको प्रयास सफल हुन सकेको छैन।
पालिसेड्समा आगोले अन्यत्रभन्दा विकराल रुप लिएको छ। यहाँको २० हजार एकडभन्दा बढी जमिन आगलागीबाट प्रभावित भएको छ। अहिलेसम्म जम्मा आठ प्रतिशत आगो नियन्त्रणमा आइसकेको छ।
इटनमा लागेको आगलागीका कारण करिब १४ हजार एकड क्षेत्रफल जलेर खरानी भएको छ। यहाँ तीन प्रतिशत आगो नियन्त्रणमा आएको जनाइएको छ।
लिडियामा लागेको आगो ७५ प्रतिशत नियन्त्रणमा आइसकेको छ। यहाँ आगलागीबाट करिब ४०० एकड जमिन प्रभावित भएको छ।
हर्स्टमा ७७१ एकड जमिन जलेको छ र आगो ३७ प्रतिशत नियन्त्रणमा आइसकेको छ।
यसैबीच केनेथमा एक हजार एकडभन्दा बढी क्षेत्रमा फैलिएको आगो फैलिनबाट रोकिएको छ। अहिलेसम्म ३५ प्रतिशत आगो नियन्त्रणमा आइसकेको बीबीसीमा जनाइएको छ।
