मुगाली निर्देशक टोमा लामाको ‘फेके’ चलचित्र अमेरिकामा भव्य प्रर्दशन

न्युयोर्क- अमेरिकाको न्यूयोर्कस्थित ज्याक्सन हाईटमा मुगाल (मुगोम) समुदायमा आधारित फेके चलचित्र प्रदर्शन गरिएको छ । मुगोम समुदायका प्रथम निर्देशक टोमा लामाले निर्देशन गरेको ‘फेके-Mother Tongue’ चलचित्रको जनवरी ११ मा भव्य प्रदर्शन भएको हो । चलचित्र हेर्न न्यूयोर्कमा बसोबास गर्ने विभिन्न क्षेत्र, पेशा तथा व्यवसायमा संलग्न विशेष व्यक्तित्वहरु उपस्थित् भएका थिए । चलचित्र ‘फेके’ हेरेपछि दर्शकहरुले खुलेर तारिफ गरका छन् । दर्शकहरुले यस्ता सन्देशमुलक चलचित्रहरु आगामी दिनहरुमा पनि आउनु पर्ने भन्दै निर्देशकलाई शुभकामना दिए ।

निर्देशक टोमा लामा कर्णाली क्षेत्रको पहिलो महिला चलचित्र निर्देशक पनि हुन् । फेके चलचित्र नेपाल सरकार चलचित्र विकास बोर्डबाट सन् २०१७ मा सम्मानित चलचित्र हो । यो चलचित्र नेपाल इन्डिजेनिअस फिल्म फेस्टिबल न्यूयोर्क २०१७ मा बेस्ट शर्ट मुभीमा नोमिनेशनमा परेको थियो भने प्रदर्शनसमेत भएको थियो ।

चलचित्रको मुख्य भुमिकामा रहेका निर्देशक टोमा लामाका पिता आङग्याल लामाले उक्त फेस्टिबलमा सहभागिता जनाएका थिए । आङग्याल न्यूयोर्क फेस्टिबलमा भाग लिने एक मात्र नेपाली थिए ।

विभिन्न राष्ट्रिय अन्तर्राष्ट्रिय फिल्म फेस्टिबलहरुमा प्रर्दशन भइसकेको फेके चलचित्र एक जना व्यक्तिले आफ्नो मुगाल मातृभाषाको संरक्षण र संबर्द्धन, विकास तथा प्रचार प्रसार र सुचनाको हकको लागि राज्यसंग गरेको संघर्षको नालीबेली र लामो संघर्षपछि उसले प्राप्त गरेको सफलताको कथा राखिएको छ ।

चलचित्रमा गोविन्द प्रभात, मनोज कुमार भेटवाल, गंगा लिम्बु, राजु मोरे, दोर्जे मोक्तान, खेन्पो पेमा ग्याछो डावा ख्यूङकार, आचार्य ङवाङ लादाकी, फुर्बा तेन्जिङ शेर्पा, दावा शेर्पा, नोर्वु गुरुङ लगायतका कलाकारहरुको अभिनय रहेको छ । निर्देशक टोमा लामा स्वयंको पनि चलचित्रमा अभिनय रहेको छ ।

न्यूयोर्कमा हालै पुनः प्रदर्शन भएको चलचित्र हेर्न युनाइटेड शेर्पा एसोसियसन युएसए इंक का अध्यक्ष तेम्बा शेर्पा र पूर्व अध्यक्ष उर्गेन शेर्पा, न्यूयोर्कका लागि तत्कालीन पर्यटन सद्भावना दूत तथा अमेरिकाको लोकप्रिय समाजसेवी केशव राम राई, हेलो अमेरिकाको चर्चित प्रस्तोता सुमन थाम्सुहाङ लिम्बू, वरिष्ठ चलचित्र निर्देशक किशोर सुब्बा, नायिका यन्सरी तमु, माइनोरेटी इम्पावरमेन्ट नेटवर्कका अध्यक्ष श्याम कार्की, युनाइटेड मुगुम अर्गानाइजेशन इंकका अध्यक्ष छिरिङ तेम्बा तथा पूर्व अध्यक्ष आङग्याल लामा र न्यूयोर्कका सक्रिय युवा सदु लिम्बू लगायतको उपस्थिति रहेको थियो ।

निर्देशक टोमा लामाले यसअघि मुगाल समुदायको पहिलो चलचित्र ‘सोल्जी’ निर्देशन गरेकी थिइन् । उक्त चलचित्र पनि विभिन्न राष्ट्रिय अन्तर्राष्ट्रिय फिल्म फेस्टीबलमा भाग लिई प्रर्दशन भई सम्मान तथा अवार्ड पाइसकेको छ । हाल यो चलचित्र सोल्जी टोमा लामा युट्युब च्यानलमा राखिएको छ ।