डलरमा अङ्कित ऐतिहासिक व्यक्तित्व

अमेरिकाको सय डलरको नोटमा बेन्जामिन फ्रेङ्कलिनको तस्बिर छापिएको छ। फ्रेङ्कलिनको योगदानलाई विश्वले सम्मान गर्दछ। आफूले गरेको आविष्कारमा सबै मानिस र समुदायको निरन्तर हक रहोस् भनेर आफ्नो नाममा प्याटेन्ट (एकस्व) समेत उनी लिँदैनथे।

फ्रेङ्कलिन अमेरिकाका एक संस्थापक पनि हुन्। उनी राष्ट्रपति नभए पनि आविष्कारक, वैज्ञानिक, कूटनीतिज्ञ, समाजसेवी, राजनीतिज्ञ, शिक्षक र लेखकका रूपमा महìवपूर्ण योगदानका लागि परिचित छन्। अमेरिकी स्वतन्त्रता सङ्ग्रामपछिका पहिलो राष्ट्रपति जत्तिकै उनलाई सम्मान गरिन्छ।

फ्रेङ्कलिन बहुमुखी प्रतिभाका धनी थिए। उनले आफ्नो समयका सबैजसो क्षेत्रमा ठूलो योगदान दिए। उनीसँग सधैँ नयाँ विचार र ज्ञानको खोज गर्ने जिज्ञासा थियो। उनको जीवनले अमेरिकी मूल्य, स्वतन्त्रता र आत्मनिर्भरताको भावना झल्काउँछ।

फ्रेङ्कलिन अमेरिकी स्वतन्त्रता सङ्ग्रामका प्रमुख नेतामध्ये एक थिए। उनले देशको स्वतन्त्रताको पक्षमा जनतालाई सङ्गठित गर्न ठूलो योगदान गरे। उनले अमेरिकी क्रान्तिकारी विचारलाई बलियो बनाउने र विदेशी समर्थन जुटाउने काम गरेका थिए। अमेरिकी जनतालाई असल विचारले मार्गदर्शन गर्ने हान शिक्षकका रूपमा उनको सामाजिक पहिचान स्थापित छ।

यसै गरी अमेरिकाको ५० डलरको नोटमा उलिसेस एस. ग्रान्टको तस्बिर छापिएको छ। उनी अमेरिकाका १८ औँ राष्ट्रपति हुन्। अमेरिकाको गृहयुद्ध कालमा सङ्घीय सेनाको जनरलको जिम्मेवारीमा रहेर उनले खेलेको भूमिका महत्वपूर्ण मानिन्छ।

बीस डलरको नोटमा एन्ड्य्रु ज्याक्सनको तस्बिर राखिएको छ। उनी अमेरिकाको सातौँ राष्ट्रपति रहेको समयमा जनताको लोकतान्त्रिक आवाजलाई प्रतिनिधित्व गर्ने काम गरेको सम्मानमा डलरमा तस्बिर अङ्कित गरी उनलाई सम्मान गरिएको छ।

यसै गरी १० डलरको नोटमा अलेक्जेन्डर ह्यामिल्टनको तस्बिर राखिएको छ। उनले अमेरिकी कंग्रेसको पहिलो कोषाध्यक्षको जिम्मेवार पदमा रहेर अमेरिकाको आर्थिक व्यवस्थाको आधारशीला निर्माण गरेका थिए।

पाँच डलरको नोटमा अब्राहम लिङ्कनको तस्बिर राखिएको छ। उनी अमेरिकाका १६ औँ राष्ट्रपति हुन्। उनले दासप्रथा अन्त्य गर्न र देशलाई विभाजनबाट जोगाउन महìवपूर्ण योगदान गरेका थिए।

यस्तै अमेरिकाको दुई डलरको नोटमा थोमस जेफरसनको तस्बिर छ। उनी अमेरिकाको तेस्रो राष्ट्रपति हुन्। अमेरिकी स्वतन्त्रता घोषणापत्र तयारी पार्ने प्रमुख लेखकहरूमध्ये उनी पनि एक थिए। अमेरिकी एक डलरको नोटमा जर्ज वासिङ्टनको तस्बिर अङ्कित गरिएको छ। उनी अमेरिकाको प्रथम राष्ट्रपति हुन्। उनलाई राष्ट्रका पिता पनि भनिन्छ।

अमेरिकी नोटहरूमा यी व्यक्तिको फोटा छापिनुको कारण हो, उनीहरूले अमेरिकाको निर्माण र प्रगतिमा आआफ्नो तहबाट गरेको अतुलनीय योगदान। उनीहरूको तस्बिर नोटमा अङ्कित गरेर अमेरिकाले उनीहरूको सम्मानजनक सम्झनालाई निरन्तरता दिने काम गरेको छ।

कुनै पनि देशका नोटमा अङ्कित गरिएका तस्बिर, आकृति र विम्बहरूले त्यस देशका ऐतिहासिक व्यक्तित्व तथा ऐतिहासिक र सांस्कृतिक घटनाको प्रतिनिधित्व गरेको हुन्छ।