न्यूयोर्क डे-केयरमा बच्चाको मृत्यु प्रकरण : संचालिका ग्रेई मेंडेजलाई ४५ वर्षको जेल सजाय
न्यूयोर्क- न्यूयोर्क सिटीमा सञ्चालन भइरहेको एक डे-केयरमा फेन्टानाइल सेवनका कारण एक शिशुको मृत्यु भएपछि उक्त केन्द्रकी सञ्चालिका ग्रेई मेंडेजलाई संघीय लागू औषधसम्बन्धी अभियोगमा दोषी ठहर गर्दै ४५ वर्षको जेल सजाय सुनाइएको छ।
३७ वर्षीय मेंडेजलाई न्यायाधीश जेड एस. राकअफले सजाय सुनाउँदा उनी भावुक भई टाउको झुकाएर रोएकी थिइन्। फैसला सुनाउँदा पीडित परिवारका सदस्य तथा मृतक बालक निकोलस फेलिज-डोमिनिसीका आमाबाबु अदालतमा उपस्थित थिए।
यसअघि, यही अभियोगमा मेंडेजका पति फेलिक्स हेरेरा-गार्सियालाई समेत ४५ वर्षकै जेल सजाय सुनाइएको थियो। अभियोगअनुसार, दम्पतीले ब्रोंक्सस्थित अपार्टमेन्टबाट ‘दिविनो निनो’ नामक डे-केयर सञ्चालन गरिरहेका थिए, जहाँ लागू औषधको भण्डारण तथा प्याकेजिङ गर्ने कामसमेत भइरहेको थियो।
सन् २०२३ सेप्टेम्बर १५ मा डे-केयरमा भएको विषाक्त सेवन घटनापछि २२ महिने बालक निकोलसलाई अस्पताल पुर्याइए पनि उनलाई बचाउन सकिएन। घटनामा संलग्न अन्य तीन बालबालिकाको भने समयमै नार्कान औषधि दिएर ज्यान जोगाइएको थियो।
प्रहरीले अनुसन्धानका क्रममा खेल्ने म्याटमाथि फेन्टानाइलको ईंटा जस्तै आकारको प्याकेट भेट्टाएको थियो। साथै, लागू औषध प्याकेजिङ गर्न प्रयोग हुने उपकरण तथा खेल्ने ठाउँमुनि बनाइएको गोप्य ढोकाबाट पनि ठूलो परिमाणमा फेन्टानाइल बरामद गरिएको थियो।
सजाय सुनाउनु अघि मेंडेजले अदालतमा आफ्ना ग्राहक बालबालिकाका परिवारहरूप्रति दुःख व्यक्त गर्दै घटनालाई ‘दुर्घटना’ भएको दाबी गरिन्। उनले भनिन्, “म साँच्चै धेरै दुःखी छु। मलाई आशा छ, कुनै दिन मलाई क्षमा गरिनेछ।”
मृतक निकोलसका आमाबाबुले अदालतमा बोलेका थिए। उनकी आमाले मेंडेजलाई कहिल्यै क्षमा गर्न नसक्ने बताइन् भने उनका बाबुले परिवारले अझै पीडामा बाँच्नुपरेको उल्लेख गरे।
न्यायाधीश राकअफले फैसला सुनाउने क्रममा आफ्नो जीवनमा भोगेको पीडा सम्झिँदै भने, “मेरो दाजुलाई कहिल्यै क्षमा गर्न नसकिने गरी हत्या गरिएको थियो। तर कानुनको महिमा भावनाहरूलाई नजरअन्दाज गर्नु नभई तिनलाई व्यापक परिप्रेक्ष्यमा हेर्नु हो।”
अभियोगपत्रमा उल्लेख भएअनुसार, मेंडेजले आफ्ना पति र छोराछोरीको सुरक्षालाई प्राथमिकता दिँदै अन्य बच्चाहरूको ज्यान जोखिममा पारेकी थिइन्। साथै, उनीमाथि घटनाका स्पष्ट संकेतहरू देखिएपछि पनि समयमै उद्धार गर्न असफल भएको, प्रहरीसँग झूट बोलेको तथा प्रमाण नष्ट गरेको आरोप लगाइएको छ।
अभियोजकहरूले भने, “उनले आठ महिनासम्मका साना शिशुहरूलाई त्यस्तो कोठामा राखिन्, जसको भुइँमुनि ११ किलोग्रामभन्दा बढी फेन्टानाइल लुकाइएको थियो।”
यस घटनाले डे-केयर जस्ता स्थानहरूमा लागू औषधको प्रयोग र सुरक्षाका उपायहरूबारे गम्भीर प्रश्न उठाएको छ। पीडित परिवार न्याय पाएको महसुस गरे पनि उनीहरू आफ्नो बच्चा गुमाएको पीडाबाट उम्किन सकेका छैनन्।
