ट्रम्पद्वारा क्षमादान पाएपछि डीसी प्रहरी विभागले दुई अधिकारीलाई पुनर्बहाली गर्यो
न्युयोर्क- वाशिङ्टन, डीसीको महानगरीय प्रहरी विभाग (MPD) ले दुई प्रहरी अधिकारीहरूलाई पुनर्बहाली गरेको छ। यी अधिकारीहरूलाई २०२० मा २० वर्षीय कारोन हाइल्टन-ब्राउनको मृत्युमा संलग्न भएको आरोपमा सजाय सुनाइएको थियो। तर, हालै राष्ट्रपति डोनाल्ड ट्रम्पले उनीहरूलाई पूर्ण क्षमादान दिएपछि उनीहरूलाई पुनः जागिरमा फर्काइएको हो।
MPD का एक अधिकारीका अनुसार अफिसर टेरेन्स सटन र लेफ्टिनेन्ट एन्ड्रयू जबाभस्कीलाई सोमबार पुनर्बहाली गरिएको छ र अहिले उनीहरू तलब पाउने अवस्थामा छन्। यसअघि कानुनी प्रक्रिया चल्दै गर्दा उनीहरूलाई तलब नदिइ निलम्बन गरिएको थियो।
“अफिसर सटन र लेफ्टिनेन्ट जबाभस्की पुनर्बहाली भएका छन्। प्रहरी विभागले कर्मचारी मामिलामा थप प्रतिक्रिया दिँदैन,” एमपीडी प्रवक्ताले भने।
तर, यी अधिकारीहरूलाई काममा फर्किनुअघि व्यापक पुनःतालिम दिनुपर्ने बताइएको छ। उनीहरूलाई सार्वजनिक रूपमा जिम्मेवारी दिइने वा नदिइने विषय अझै स्पष्ट भएको छैन।
अदालतले टेरेन्स सटनलाई दोस्रो-डिग्री हत्या, न्याय अवरोधको षड्यन्त्र, र न्याय अवरोधसम्बन्धी आरोपमा दोषी ठहर गरेको थियो। उनलाई ६६ महिनाको जेल सजाय सुनाइएको थियो। जबाभस्कीलाई पनि न्याय अवरोधको षड्यन्त्र र न्याय अवरोधमा दोषी पाइएपछि ४८ महिनाको सजाय सुनाइएको थियो।
तर, ट्रम्पले पद ग्रहण गरेपछि उनीहरूलाई “पूर्ण र बिना सर्त क्षमादान” दिएका थिए।
अभियोजनकर्ताहरूका अनुसार, अक्टोबर २०२० मा, सटन र जबाभस्कीले हेलमेट नलगाई मोपेड चलाइरहेका हाइल्टन-ब्राउनलाई देखेपछि उनीमाथि “अत्यधिक गतिमा” पछ्याएका थिए। सोही क्रममा, हाइल्टन-ब्राउनलाई अर्को सवारी साधनले ठक्कर दिँदा उनको मृत्यु भएको थियो।
घटनापछि, अधिकारीहरूले आफ्नो शरीरमा लगाइएका क्यामेरा बन्द गरेको, घटनास्थलमा छेडछाड गरेको, र कमाण्डिङ अफिसरहरूलाई गलत सूचना दिएको अनुसन्धानकर्ताहरूले जनाएका थिए।
तर, बचाउ पक्षका वकिलहरूले घटनाका विवरण अस्वीकार गर्दै अदालतले महत्वपूर्ण प्रमाणहरू अस्वीकृत गरेको बताएका थिए। सटनका वकिल केलन ड्वायरका अनुसार, उनीहरूले अदालतको फैसलालाई अपीलमार्फत उल्टाउने अपेक्षा गरेका थिए।
डीसी प्रहरी विभागले अधिकारीहरूको क्षमादानका लागि राष्ट्रपति ट्रम्पलाई धन्यवाद दिएको थियो।
“यी अधिकारीहरूले कहिल्यै कल्पना गरेका थिएनन् कि आफ्नो कार्यक्षेत्रमा गरिएका निर्णयहरू अपराधका रूपमा अभियोग लाग्न सक्छ। विभागले सवारीसाधन पछ्याउने कार्यको जोखिम बुझ्छ, र हाम्रो नीति त्यसलाई प्रतिबिम्बित गर्छ। तर, नीति उल्लंघनलाई प्रशिक्षण र अनुशासनमार्फत सम्बोधन गरिनुपर्छ, आपराधिक अभियोजन होइन,” एमपीडीको विज्ञप्तिमा उल्लेख गरिएको थियो।
जनवरीमा सटनले भनेका थिए, “मैले राष्ट्रपति ट्रम्पबाट क्षमादान पाएर आश्चर्यचकित भएँ। म प्रहरी विभागमा फर्किएर आफ्नो करिअर पूरा गर्न चाहन्छु।”
उनले त्यो बेला भनेका थिए, “मलाई पुनः जागिरमा फर्किन सम्भव छ कि छैन भन्ने कुनै अनुमान छैन।”
