ट्रम्पद्वारा मेक्सिको, क्यानडा र चीनमाथि उच्च दरको शुल्क लागू

वासिङ्टन डीसी – अमेरिकी राष्ट्रपति डोनाल्ड ट्रम्पद्वारा लागू गरिएको २५% शुल्क (ट्यारिफ) मंगलबारदेखि मेक्सिको र क्यानडाबाट आयात गरिने सम्पूर्ण वस्तुहरूमा प्रभावकारी भएको छ। अमेरिकाका शीर्ष व्यापारिक साझेदारहरूमाथि दबाब सिर्जना गर्न गरिएको यो असाधारण कदमले उत्तर अमेरिकी अर्थतन्त्र, साथै अमेरिकी अर्थतन्त्र नै कमजोर पार्नसक्ने चिन्ता उत्पन्न गरेको छ।

साथै, ट्रम्पले चीनबाट आयात हुने सम्पूर्ण वस्तुहरूमा लाग्ने शुल्क दोब्बर पार्दै १०% बाट २०% पुर्याएका छन्। यी नयाँ करहरू चीनबाट आउने सयौं अर्ब डलर बराबरका वस्तुहरूमा लाग्ने पहिल्यैका करहरूमा थप रूपमा लागु हुनेछन्।

“राष्ट्रपति ट्रम्पले मेक्सिको र क्यानडालाई आफ्नो देश हुँदै अमेरिका प्रवेश गर्ने घातक लागूपदार्थहरूको कारोबार नियन्त्रण गर्न पर्याप्त अवसर दिएका थिए। तर, उनीहरूले यसलाई पर्याप्त रूपमा सम्बोधन गर्न असफल भएका छन्,” नयाँ शुल्क लागू हुनु केही घण्टा अघि जारी गरिएको श्वेत भवनको वक्तव्यमा उल्लेख छ।

नयाँ शुल्क लागू भइरहेका बेला अमेरिका उच्च मुद्रास्फीति (इन्फ्लेसन) को समस्यामा रहेको छ। अमेरिकी अर्थतन्त्र नै अस्थिर अवस्थामा रहेको हालैको तथ्यांकहरूले देखाएका छन्।

यी शुल्कहरूले अमेरिकामा दैनिक उपभोग गरिने विभिन्न वस्तुहरूको मूल्य वृद्धि गर्न सक्ने सम्भावना छ। मेक्सिको, क्यानडा र चीनबाट अमेरिका आउने वस्तुहरूको कुल मूल्य १.४ ट्रिलियन डलर रहेको वाणिज्य विभागका तथ्यांकहरूले देखाउँछन्। यो गत वर्ष अमेरिका आयात गरेको कुल वस्तुहरूको ४०% भन्दा बढी हिस्सा हो।

कुन-कुन वस्तु प्रभावित हुने?
– क्यानडाबाट आयात हुने वस्तुहरू: अधिकांश वस्तुमा २५% कर लागे पनि ऊर्जा-सम्बन्धित वस्तुहरू (जस्तै कच्चा तेल) मा मात्र १०% कर लगाइएको छ।
– मेक्सिकोबाट आयात हुने वस्तुहरू: ताजा फलफूल तथा तरकारी, गाडी तथा गाडीका पार्टपुर्जा, इलेक्ट्रोनिक्स (जस्तै मोबाइल फोन, कम्प्युटर) आदिमा २०% देखि २५% सम्मको कर लाग्नेछ।
– चीनबाट आयात हुने वस्तुहरू: पहिले १०% कर लगाइएका अधिकांश वस्तुहरूमा अब २०% कर लाग्नेछ।

ट्रम्प प्रशासनको यो नीति अमेरिकी बजारमा मूल्यवृद्धि ल्याउने, उपभोक्तामाथि भार पार्ने, र व्यापार साझेदार राष्ट्रहरूसँगको सम्बन्धलाई तनावपूर्ण बनाउने विश्लेषकहरूले बताएका छन्।