अमेरिका–युक्रेन वार्ता पुनः सुरु हुन सक्ने उपराष्ट्रपति जे.डी. भान्सले दिए संकेत
न्युयोर्क- अमेरिकी उपराष्ट्रपति जे.डी. भान्सले फक्स न्युजको ‘ह्यानिटी’ कार्यक्रममा दिएको अन्तर्वार्तामा युक्रेन र संयुक्त राज्य अमेरिकाबीच वार्ता पुनः सुरु हुन सक्ने संकेत दिएका छन्। उनले राष्ट्रपति डोनाल्ड ट्रम्पको प्रशासनले रूससँग शान्ति योजनामाथि “पहिले नै काम गरिरहेको” बताएका छन्।
उनीसँग सोधिएको थियो कि यदि युक्रेनी राष्ट्रपति भोलोदिमिर जेलेन्स्की वार्तामा फर्कन इच्छुक भए, तिनलाई स्वागत गरिनेछ कि नगर्ने? जवाफमा भान्सले भने, “यदि उनी वार्ताको प्रक्रियामा गम्भीर रूपमा संलग्न हुन चाहन्छन् भने पक्कै पनि हामी वार्ता गर्न चाहन्छौं।”
भान्सका अनुसार, प्रशासनले पहिले नै रूससँग वार्ता गरिरहेको छ, साथै अमेरिकाका केही सहयोगी राष्ट्रहरूसँग पनि छलफल भइरहेको छ। उनले भने, “जेलेन्स्कीले वार्तामा गम्भीर रूपमा संलग्न हुनुपर्छ। जब त्यो हुन्छ, हामी पक्कै पनि कुराकानी गर्न तयार छौं।”
भान्सले यो वार्ताका लागि युक्रेनसँगको ‘खनिज सम्झौता’ पनि महत्त्वपूर्ण हुने बताएका छन्। उनले उक्त सम्झौताले अमेरिका र युक्रेन दुवैका लागि “वास्तविक सुरक्षा प्रत्याभूति” ल्याउने दाबी गरे।
उनले भने, “सुरक्षा प्रत्याभूतिसँगै, युक्रेनको पुनर्निर्माणका लागि आर्थिक प्रत्याभूति पनि महत्त्वपूर्ण छ। यसले अमेरिकालाई युक्रेनको भविष्यमा दीर्घकालीन आर्थिक लाभ सुनिश्चित गर्नेछ।”
यस बयानपछि ट्रम्प प्रशासनले रूससँग कस्ता वार्ताहरू अघि बढाइरहेको छ भन्नेबारे विभिन्न अड्कलबाजीहरू भइरहेको छ।
