न्युयोर्कमा नेपाली समाजसेवी विश्वराज बाँस्तोलालाई मानार्थ डाक्टरको उपाधि
न्युयोर्क – नेपाली समुदायमा पहिचान बनाएका समाजसेवी विश्वराज बाँस्तोलाले सिआईसिए इन्टरनेसनल युनिभर्सिटीबाट मानार्थ डाक्टरको उपाधि प्राप्त गरेका छन्। शैक्षिक, सामाजिक तथा मानवअधिकारका क्षेत्रमा सक्रिय योगदान पुर्याएका व्यक्तित्वलाई प्रदान गरिने यो उपाधिले उनको दीर्घकालीन सेवाको सम्मान गरेको छ।
शिक्षा र सामाजिक सेवामा समर्पित बाँस्तोलाले मानव सेवामा दर्शनशास्त्र विषयमा मानार्थ डाक्टरको उपाधि प्राप्त गरेका हुन्। नेपालमा रहँदा उनी विभिन्न विद्यालयमा शिक्षक र प्रधानाध्यापकको भूमिकामा रहेर शैक्षिक विकासमा योगदान दिएका थिए। साथै, नेपाल सरकारको विशेष शिक्षा परिषदमा विशेषज्ञका रूपमा काम गर्दै शिक्षा क्षेत्रको नीति निर्माणमा समेत संलग्न थिए।
शिक्षण पेशामा सक्रिय रहँदा उनले स्थानीय तथा राष्ट्रिय स्तरका पुरस्कारहरू प्राप्त गरिसकेका छन्। सन् २०१० मा अमेरिका आएका बाँस्तोला हाल न्युयोर्कको लङआइल्याण्डमा बसोबास गर्दै आएका छन्। उनी नेपाली जनसम्पर्क समिति, सिसिएनयस, अन्तर्राष्ट्रिय कास्की समाज, हेमजा समाज, वहिरा समाज, एनआरएनलगायत विभिन्न संस्थामा आबद्ध भई नेपाली समुदायको हितमा कार्यरत छन्।
बाँस्तोलाको सक्रियता र योगदानको कदर गर्दै वेस्टर वे नगरले उनलाई “प्रभावशाली व्यवस्थापक” र “मानवअधिकार रक्षक” को रूपमा समेत सम्मान गर्दै सन् २०२३ को सेप्टेम्बर ६ लाई “विश्वराज बाँस्तोला दिवस” को रूपमा घोषणा गरेको थियो।
नेपाली पहिचानको प्रवर्द्धनमा विशेष भूमिका निर्वाह गर्दै बाँस्तोलाले गत वर्ष सेप्टेम्बर २३ मा लङआइल्याण्डको हेम्पस्टेड नगरमा नेपालको झण्डा फहराउने कार्यक्रमको संयोजन समेत गरेका थिए।
नेपाल र प्रवास दुवै स्थानमा शिक्षा तथा सामाजिक सेवामा योगदान पुर्याउँदै आएका बाँस्तोलाको उपस्थिति नेपाली समुदायका लागि प्रेरणादायी बनेको छ।
