युकेआरओए न्यूयोर्क च्याप्टरको सातौं अधिवेशन भव्य रूपमा सम्पन्न
न्युयोर्क- युनाइटेड किरात राई अर्गनाइजेसन अफ अमेरिका (UKROA) न्यूयोर्क च्याप्टरले आफ्नो सातौं अधिवेशन २०२५ फेब्रुअरी २४ मा न्यूयोर्कको ज्याक्सन हाइट्समा भव्य रूपमा सम्पन्न गरेको छ।
यस अधिवेशनले २०२५ देखि २०२८ कार्यकालका लागि अरुण मेवाङ् राईको नेतृत्वमा १५ सदस्यीय कार्यसमिति चयन गरेको छ। साथै, एक संस्कृति संयोजक र एक महिला संयोजकसहित कुल १७ सदस्यीय कार्यसमिति सर्वसम्मत रूपमा चयन गरिएको छ।
समारोहका प्रमुख अतिथि तथा वर्तमान केन्द्रीय सदस्य गरचा राईले सम्बोधन गर्दै किरात राई समुदाय जहाँ भए पनि आफ्ना संस्कार, संस्कृति तथा पहिचानको संरक्षणमा अग्रसर हुनुपर्ने धारणा व्यक्त गर्नुभयो। उहाँले युवाहरू प्रारम्भमा बाहिरी चमक-धमकप्रति आकर्षित भए पनि उमेर बढ्दै जाँदा आफ्नो संस्कार र पहिचानको महत्त्व अझ गहिरोसँग बुझ्ने बताउँदै, संस्कृति जगेर्नाका लागि युवा पुस्तालाई सक्रिय भूमिका निर्वाह गर्न आग्रह गरे।
संस्थाका संस्थापक सदस्य तथा पूर्व न्यूयोर्क अध्यक्ष एवं केन्द्रीय उपाध्यक्ष केसव राम राईले निवर्तमान अध्यक्ष ममता राई नेतृत्वको कार्यसमितिले उल्लेखनीय कार्यहरू गरेको भन्दै नयाँ कार्यसमितिले अझ सशक्त रूपमा अगाडि बढ्नुपर्ने सुझाव दिए।
कार्यक्रममा न्यूयोर्क च्याप्टरका सल्लाहकार गोविन्द राई, अन्तर्राष्ट्रिय कराते रेफ्री एवं प्रशिक्षक सेनसेइ पर्खी खालिङ राई, तथा सुकु रुम्दाली राई लगायतले आ-आफ्नो धारणा राख्दै नवगठित कार्यसमितिलाई सफल कार्यकालको शुभकामना व्यक्त गरेका थिए।
निवर्तमान अध्यक्ष ममता खालिङ राईले आफ्नो तीनवर्षे कार्यकाललाई ऐतिहासिक रहेकाे बताउँदै, २०२२ देखि संस्थामा नयापन ल्याउने प्रयास सफल रहनुको पछाडि सम्पूर्ण कार्यसमिति र किरात राई परिवारको ऐक्यबद्धता रहेको उल्लेख गरिन्। उनले न्यूयोर्क च्याप्टरको नेतृत्वमा आयोजित साकेला पर्वको महत्त्व उजागर गर्दै, टाइम्स स्क्वायरमा पहिलो पटक गरिएको उभौली साकेला सिली कार्यक्रम ऐतिहासिक रहेको स्मरण गराइन्। त्यस्तै सिटीको तर्फबाट उत्कृष्ट आठ कलाकारलाई प्रमाणपत्र वितरण गरिएको प्रसंग जोड्दै, अमेरिकास्थित किरात राई समुदायलाई आर्थिक, सामाजिक, तथा सांस्कृतिक रूपमा उन्नति गराउन संस्थाको योगदान निरन्तर रहने बताइन्।
निर्वाचन प्रक्रिया सफलतापूर्वक सम्पन्न गर्दै निर्वाचन आयुक्त प्रभाकर राईले अरुण मेवाङ् राईको अध्यक्षतामा गठित कार्यसमिति घोषणा गरेका थिए। नवनिर्वाचित कार्यसमितिका पदाधिकारीहरू:
अध्यक्ष: अरुण राई
वरिष्ठ उपाध्यक्ष: बसन्ती राई
उपाध्यक्ष: प्रमल राई, तेशुराज राई
महासचिव: सृजना वाहिङ
सचिव: उत्तर थुलुङ राई
कोषाध्यक्ष: विनोद चाम्लिङ राई
सह-कोषाध्यक्ष: मनिषा चाम्लिङ राई
बोर्ड सदस्य: उधिर राई, निलम राई, दिपेस राई, जेनी महर्जन राई, शान्ति राई, अर्पन राई, मनिराज राई
संस्कृति संयोजक: रोशन राई
महिला संयोजक: सरिता राई
नवनिर्वाचित अध्यक्ष अरुण राईले निर्वाचन आयुक्त प्रभाकर राईलाई धन्यवाद दिँदै निवर्तमान अध्यक्ष ममता राईको कार्यसमितिले समुदायका लागि पुर्याएको योगदानको सम्मान गरे। उनले भाषा र संस्कृतिको जगेर्नाका लागि पूर्ण रूपमा समर्पित रहने प्रतिबद्धता व्यक्त गर्दै, वार्षिक कार्ययोजना निर्माण गरी अमेरिकी किरात राई समुदायलाई अझै उच्च स्तरमा पुर्याउने संकल्प व्यक्त गरे।
अधिवेशनमा संस्थाको आर्थिक प्रतिवेदन उपाध्यक्ष कृष्ण प्रसाद राईले प्रस्तुत गरेका थिए। पहिलो सत्र कार्यक्रम महासचिव बद्री कुमार राईको सञ्चालनमा सम्पन्न भएको थियो।
