पूर्व ओलम्पिक स्नोबोर्डर ड्रग तस्करी र हत्यामा संलग्न, पक्राउ गर्न सूचना दिनेहरूलाई १० मिलियन डलर इनाम
लस एन्जलस – क्यानडाका पूर्व ओलम्पिक स्नोबोर्डर रयान वेडिङलाई पक्राउ गर्न सहयोग पुर्याउने सूचना दिने व्यक्तिलाई १० मिलियन डलर इनाम घोषणा गरिएको छ। उनी अन्तर्राष्ट्रिय स्तरको लागुऔषध तस्करी सञ्जाल सञ्चालन गरेको र यससँग सम्बन्धित धेरै हत्यामा संलग्न भएको आरोपमा एफबीआईको ‘१० मोस्ट वान्टेड’ सूचीमा परेका छन्।
अमेरिकी स्टेट डिपार्टमेन्टले वेडिङलाई पक्राउ गर्न सूचना दिने व्यक्तिका लागि १० मिलियन डलर पुरस्कार घोषणा गरेको हो। एफबीआईको लस एन्जलस फिल्ड अफिसका सहायक निर्देशक अकील डेभिसका अनुसार, “वेडिङले ओलम्पिकको हिउँमै रमाउने खेलबाट लागुऔषध तस्करीमा प्रवेश गरे, र प्रतिस्पर्धीहरूको हत्या गर्नेसम्मको अपराधमा संलग्न भए, जसले उनलाई अत्यन्त खतरनाक व्यक्ति बनाएको छ।”
४३ वर्षीय वेडिङलाई ‘एल जेफे’, ‘पब्लिक एनिमी’, र ‘जेम्स कोनराड किङ’ लगायतका उपनामले चिनिन्छ। उनलाई गत जुन महिनामा हत्या र लागुऔषध तस्करी सम्बन्धी अभियोग लगाइएको थियो। सेप्टेम्बरमा गरिएको थप अनुसन्धानपछि उनी ६० टन कोकिनको वार्षिक ओसारपसार गर्ने अन्तर्राष्ट्रिय सञ्जाल चलाएको प्रमाण फेला परेको थियो। उक्त लागुऔषध कोलम्बिया, मेक्सिको, दक्षिणी क्यालिफोर्निया हुँदै क्यानडासम्म पुर्याइने गरिएको बताइएको छ।
गत अक्टोबरमा सार्वजनिक अभियोग अनुसार, सो घटनामा संलग्न एक दर्जन व्यक्तिहरूलाई पक्राउ गरिएको छ। अमेरिकी अधिकारीहरूको अनुसार, वेडिङको समूहले चोरी भएको लागुऔषधको बदला लिन क्यानडामा एउटै परिवारका दुई सदस्यको हत्या गरेको थियो, जुन पहिचान त्रुटिका कारण भएको थियो। साथै, समूहले अन्य दुई व्यक्तिहरूको हत्या गरेको आरोपसमेत लगाइएको छ।
स्नोबोर्डिङ खेलाडीको रूपमा वेडिङले २००२ ओलम्पिकमा समानान्तर जायन्ट स्लालम प्रतिस्पर्धामा भाग लिँदै २४औं स्थान हासिल गरेका थिए। अहिले उनी फरार छन्, र एफबीआईले उनको खोजीलाई तीव्र पारेको छ।
