पूर्व पादरी तथा बाल यौन दुराचारीलाई राहदानी ठगी आरोपमा एक वर्षको सजाय, अमेरिका निष्कासनको आदेश

न्युयोर्क- अमेरिकामा बसोबास गरिरहेका ६९ वर्षीय कोलम्बियाली नागरिक, पूर्व पादरी तथा सजाय प्राप्त बाल यौन दुर्व्यवहारकर्ता जोर्गे एन्टोनियो भेलेज-लोपेजलाई राहदानी ठगीको अभियोगमा एक वर्षको जेल सजाय सुनाइएको छ। साथै, उनलाई अमेरिकी नागरिकताबाट वञ्चित गरी अमेरिका  निष्कासित गर्ने आदेश दिइएको छ।

भेलेज २००३ मा अस्थायी धार्मिक कार्यकर्ताको रूपमा अमेरिका प्रवेश गरेका थिए। उनले २००७ मा स्थायी बसोबासको निवेदन दिँदा कुनै नैतिक पतनसम्बन्धी अपराध नगरको झुटो जानकारी दिएका थिए। उनले २०१३ मा अमेरिकी नागरिकताको लागि आवेदन दिँदा पनि यस्तै झुटो विवरण प्रस्तुत गरेका थिए। अन्ततः २०१३ मा उनलाई अमेरिकी नागरिकता प्रदान गरिएको थियो।

तर, २०२० मा मेरील्यान्ड राज्यको होवार्ड काउन्टीमा उनलाई बाल यौन दुर्व्यवहारका विभिन्न अभियोगमा पक्राउ गरिएको थियो। २०२१ मा उनले बाल यौन शोषणको अभियोग स्वीकार गरेपछि उनलाई नौ वर्षको जेल सजाय सुनाइएको थियो। अनुसन्धानको क्रममा थाहा भयो कि उनले २००३ देखि २००९ सम्म एक बालकलाई यौन दुर्व्यवहार गरेका थिए।

यो मुद्दा अमेरिकी अध्यागमन तथा भन्सार प्रवर्तन (ICE) को अनुसन्धान अन्तर्गत थियो, जसको उद्देश्य अपराधीहरू, विशेष गरी बाल यौन दुर्व्यवहारकर्ता तथा ठगी गरेर अमेरिकी नागरिकता लिएका व्यक्तिहरूको पहिचान गरी कानुनी कारबाही गर्नु हो। अमेरिकाको न्याय मन्त्रालय तथा अन्य सरकारी निकायहरूले यस मामिलामा सहयोग गरेका थिए।