न्यूयोर्कमा त्रिवेणी टाइम्सको सिफारिसमा मनोज बस्नेत सम्मानित
न्यूयोर्क – अमेरिकाको न्यूयोर्कबाट सञ्चालित मिडिया हाउस त्रिवेणी टाइम्सको सिफारिसमा अन्नपूर्ण मिडिया नेटवर्कका महाप्रबन्धक मनोज बस्नेतलाई न्यूयोर्क राज्यका एसेम्बली सदस्य डेभिड आई. वेप्रिनले सम्मानित गरेका छन्।
अन्तर्राष्ट्रिय नारी दिवसको अवसरमा त्रिवेणी टाइम्सले बस्नेतलाई न्यूयोर्क राज्यको एसेम्बलीसँग समन्वय गरी लिखित सम्मानपत्र प्रदान गराएको हो। समाचार, विचार र प्रवासी नेपाली समुदायको आवाज बुलन्द गरिरहेको त्रिवेणी टाइम्सले बस्नेतको मिडिया व्यवस्थापनमा देखाएको उत्कृष्ट कार्यकौशल र दूरदर्शी नेतृत्वको उच्च मूल्यांकन गर्दै सम्मानका लागि सिफारिस गरेको थियो।
सम्मानपत्रमा उल्लेख गरिएअनुसार, “१५ वर्षदेखि बस्नेतको उत्कृष्ट कार्यकौशल र दूरदर्शी मिडिया व्यवस्थापनका कारण अन्नपूर्ण मिडिया नेटवर्क अग्रणी नेपाली मिडिया हाउसको रूपमा स्थापित हुन सफल भएको छ। यसका लागि म बस्नेतलाई सम्मान गर्न चाहन्छु।”
त्रिवेणी टाइम्सले नेपाली मिडियाको अन्तर्राष्ट्रिय पहिचान स्थापित गर्ने उद्देश्यले अमेरिकामा रहेका विभिन्न संघसंस्थासँग समन्वय गर्दै नेपाली मिडियाकर्मीहरूलाई पहिचान, प्रोत्साहन र सम्मान गर्ने अभियान सञ्चालन गरिरहेको छ। यसै क्रममा बस्नेतलाई न्यूयोर्क राज्यको एसेम्बलीमार्फत सम्मान दिलाइएको हो।
