डिसी मेयरले ब्ल्याक लाइभ्स म्याटर प्लाजा हटाउने, ह्वाइट हाउसको दबाबको संकेत
वाशिंगटन- वाशिंगटन डिसीका मेयर म्युरियल बाउजरले ब्ल्याक लाइभ्स म्याटर प्लाजा हटाउने निर्णय गरेको पुष्टि गरेका छन्। एनबीसी वाशिंगटनका अनुसार, उक्त प्लाजाको सडकमा लेखिएको “Black Lives Matter” भन्ने भुइँचित्रलाई मेटाइनेछ, र यसको स्थानमा डिसीका स्कूली बालबालिकाले तयार पारेको नयाँ डिजाइन राखिनेछ।
बाउजरले केही दिनअघि नै यो निर्णय गरिसकेको बताएकी छिन्। निर्णयको कारणबारे प्रश्न गर्दा उनले ह्वाइट हाउसले यसलाई मन पराएको छैन भन्नु गलत नहुने प्रतिक्रिया दिइन्।
ब्ल्याक लाइभ्स म्याटर प्लाजा सन् २०२० मा जर्ज फ्लोइडको हत्यापछि गरिएको प्रदर्शनहरूकै क्रममा घोषणा गरिएको थियो। जुन ५, २०२० मा मेयर बाउजरले यस प्लाजाको उद्घाटन गर्दै भुइँचित्र सार्वजनिक गरेकी थिइन्।
तर, पछिल्लो समय यस प्लाजालाई हटाउने दबाब बढ्दै गएको थियो। गएको सोमबार, जर्जियाका रिपब्लिकन सांसद एन्ड्रयु क्लाइडले नयाँ विधेयक प्रस्ताव गरेका थिए, जसअनुसार ब्ल्याक लाइभ्स म्याटर प्लाजा हटाइएन भने डिसीको संघीय कोष रोक्ने प्रावधान राखिएको थियो। विधेयक पारित भएमा प्लाजालाई “लिबर्टी प्लाजा” नामकरण गर्नुपर्ने र सबै सरकारी कागजात तथा वेबसाइटहरूमा सोही नाम अद्यावधिक गर्नुपर्ने हुन्छ।
सांसद क्लाइडले मेयर बाउजरको निर्णयप्रति खुसी व्यक्त गर्दै भने, “मेरो विधेयक प्रस्ताव गरेको एक दिनभित्रै मेयर बाउजरले प्लाजा हटाउने योजना घोषणा गरिन्, जुन सकारात्मक संकेत हो। मेरो मुख्य लक्ष्य भनेको यो विभाजनकारी नारा हटाउने र अमेरिकी राजधानीका सडकहरूलाई यसबाट मुक्त गर्ने हो।”
क्लाइड यसअघि पनि डिसीको होम रुल एक्ट (१९७३) खारेज गर्न वकालत गरिसकेका छन्, जसअन्तर्गत डिसीलाई स्वशासनको अधिकार दिइएको थियो।
बाउजरले मंगलबार जारी गरेको वक्तव्यमा भनिएको छ, “यो म्युरलले लाखौं मानिसलाई प्रेरित गर्यो र हाम्रो सहरलाई एक पीडादायी समयमा मद्दत गर्यो। तर, अहिले संघीय सरकारको अनावश्यक हस्तक्षेपमा अल्झिनु हाम्रो लागि सम्भव छैन। संघीय जागिर कटौतीको असरलाई सम्बोधन गर्नु हाम्रो पहिलो प्राथमिकता हो।”
हालसम्म डिसी सरकारले प्लाजालाई नयाँ नाम दिने वा नदिनेबारे कुनै निर्णय गरेको छैन।
