ब्रुकलिन अस्पताल बाहिर छोडिएको तीन वर्षीय बालकको निधन, प्रहरीले अभिभावकको खोजी गर्दै

न्युयोर्क- न्युयोर्कको ब्रुकलिनस्थित एक अस्पताल बाहिर बेवारिसे अवस्थामा फेला परेका तीन वर्षीय बालकको आइतबार अल्प समयमै मृत्यु भएको छ। प्रहरी अधिकारीहरू अहिले बालकका अभिभावकको पहिचान र खोजीमा जुटिरहेका छन्।

प्रहरीका अनुसार उक्त बालक दिउँसो करिब ११:३० बजे युनिभर्सिटी अस्पताल एट डाउनस्टेटको बाहिरी परिसरमा बेहोस अवस्थामा भेटिएका थिए। तत्कालै अस्पताल भित्र लगिए पनि चिकित्सकहरूले उनलाई बचाउन सकेनन्।

कानून कार्यान्वयन निकायका स्रोतहरूका अनुसार बालकको शरीरभरि नीलडाम देखिएको थियो। उनको मृत्युको कारण र चोटपटकको विस्तृत अनुसन्धान भइरहेको छ।

प्रारम्भिक अनुसन्धानका आधारमा एक पुरुष र एक महिलाले बालकलाई अस्पताल बाहिर छोडेको विश्वास गरिएको छ। तर, ती व्यक्तिहरू बालकका अभिभावक थिए वा अन्य कुनै सम्बन्ध थियो भन्ने स्पष्ट हुन सकेको छैन। घटनाको सुराग पत्ता लगाउन प्रहरी टोलीले अस्पताल वरपरको क्षेत्र अनुसन्धान गरिरहेको छ, जसमा सम्भावित साक्षीहरूसँग बयान लिनुका साथै निगरानी क्यामेरा फुटेज जाँच्ने काम पनि भइरहेको छ।

आइतबार साँझसम्म न्यूयोर्क प्रहरीले बालकका अभिभावक वा घटनामा संलग्न हुन सक्ने व्यक्तिहरूको नाम सार्वजनिक गरेको थिएन। घटनाबारे थप अनुसन्धान जारी रहेको जनाइएको छ।