न्युयोर्क कारागार सुरक्षागार्डहरू हडताल अन्त्य गरी सोमबारदेखि पुनः काममा फर्किने

न्युयोर्क- न्युयोर्क राज्य कारागारका सुरक्षागार्डहरू सोमबारदेखि पुनः काममा फर्किने भएका छन्। राज्य सुधार तथा समुदाय पुनःस्थापना विभाग (DOCCS) सँग नयाँ सम्झौतामा पुगेपछि उनीहरूले जारी हडताल अन्त्य गर्ने निर्णय गरेका हुन्।

DOCCS का अनुसार, सम्झौता प्रभावकारी हुनका लागि सोमबार बिहान ६:४५ बजेभित्र कम्तीमा ८५% कर्मचारीहरू काममा फर्किनुपर्ने छ। सम्झौताका प्रमुख बुँदाहरूमा मानवीय वैकल्पिक एकल बन्दी प्रतिरोध (HALT) ऐनलाई ९० दिनका लागि स्थगित गर्ने तथा उक्त ऐनमा आवश्यक संशोधन पहिचान गर्न एक समिति गठन गर्ने विषय समेटिएको छ।

त्यस्तै, २४-घण्टे अनिवार्य ओभरटाइमलाई न्यूनतम गर्ने प्रयाससहित अतिरिक्त कार्यसमय (ओभरटाइम) सम्बन्धी सुधारहरू लागू गरिनेछन्। सम्झौताअनुसार, कारागारमा कर्मचारी व्यवस्थापन र सञ्चालनगत कमजोरीहरूको अध्ययन गर्न एक समिति गठन गरिने तथा कैदीहरूले पाउने चिठीपत्रमा लागू औषध परीक्षणका लागि उपयुक्त सेवा प्रदायक खोज्ने योजना अघि सारिएको छ।

यद्यपि, सम्झौतामा हडतालका कारण लाग्ने कानुनी कारबाही र जरिवाना माफी गर्ने कुनै व्यवस्था गरिएको छैन, DOCCS ले स्पष्ट पारेको छ। फेब्रुअरी १७ देखि सुरु भएको अवैधानिक हडताल शनिबार २०औँ दिनमा प्रवेश गरेको थियो। न्युयोर्कको टेलर कानुनअनुसार सार्वजनिक कर्मचारीहरूले हडताल गर्न पाउँदैनन्।

यसअघि, गभर्नर केथी होचुलले हडताल जारी राखेमा कारागार कर्मचारीहरूलाई जागिर गुम्ने, जरिवाना तिर्नुपर्ने तथा कानुनी कारबाहीको सामना गर्नुपर्ने चेतावनी दिएकी थिइन्।

हालसम्म हडताल अधिकांश डाउनस्टेट क्षेत्रका कारागारमा अन्त्य भएको छ भने अपस्टेट तथा पश्चिमी न्युयोर्कका कारागारहरूमा जारी रहेको छ।