प्रतिनिधि जैस्मिन क्रकेटको भनाइ – “अवैध रूपमा सीमा पार गर्नु अपराध होइन”

न्युयोर्क- टेक्ससकी डेमोक्र्याट प्रतिनिधि जैस्मिन क्रकेट ले शनिबार दिएको एउटा अभिव्यक्तिले ठूलो चर्चा पाएको छ। उनले अवैध रूपमा अमेरिका प्रवेश गर्नु अपराध होइन भन्दै यसलाई केवल नागरिक कानुनी उल्लङ्घन (सिभिल भायोलेसन) को रूपमा व्याख्या गरिन्।

एमएसएनबीसीको ‘द केटी फाङ शो’ मा बोल्दै, उनले हालैको संसदीय सुनुवाइमा आफूले प्रवासी नीतिबारे दिएको धारणा स्पष्ट पार्ने प्रयास गरिन्। उनका अनुसार, अवैध रूपमा अमेरिका छिर्नेहरू आपराधिक श्रेणीमा पर्दैनन्, किनभने यो कुनै गम्भीर फौजदारी अपराध होइन।

“रिपब्लिकनहरू प्रवासीहरूबारे यति आक्रोशित किन छन्? तिनीहरू अपराध बढेको भन्दै शोर मच्चाइरहेका छन्। तर, स्थानीय कानुनी निकायहरू सधैं वास्तविक अपराधकै अनुसन्धानमा केन्द्रित हुन्छन्, न कि केवल अवैध प्रवासको मुद्दामा,” क्रकेटले भनिन्।

क्रकेटको भनाइले विवाद निम्त्याएको छ, किनकि अमेरिकी संघीय कानुन ८ USC १३२५ अनुसार, पहिलो पटक अवैध रूपमा प्रवेश गर्ने व्यक्तिलाई अधिकतम ६ महिनासम्मको जेल सजाय वा जरिवाना हुन सक्छ। दोहोर्याएर अवैध रूपमा प्रवेश गर्नेहरूलाई २ वर्षसम्मको जेल हुनसक्छ।

त्यस्तै, ८ USC १३२६ अनुसार, अपराधमा दोषी ठहर भइसकेका अवैध प्रवासीहरूले पुनः प्रवेश गरेमा १० देखि २० वर्षसम्मको जेल सजाय हुन सक्छ।

तर, “अनधिकृत बसाइ” (Unlawful Presence), जस्तै भिसा अवधि समाप्त भएपछि देश नछोड्नु भने आपराधिक अपराधमा पर्दैन।

क्रकेटले रिपब्लिकनहरूलाई अवस्थागत दोगलोपन (Hypocrisy) को आरोप लगाउँदै, उनीहरू डोनाल्ड ट्रम्पको समर्थन गर्ने तर आप्रवासन कारबाहीको माग गर्ने बताइन्।

“तपाईंहरूलाई सडकमा हिँडिरहेका अपराधीहरू देखेर किन यति चिन्ता छ, जब तपाईंहरू आफैं इतिहासकै सबैभन्दा ठूला अपराधीलाई समर्थन गर्दै हुनुहुन्छ?” क्रकेटको कटाक्ष थियो।

क्रकेट डेमोक्र्याटिक पार्टीकी एक कडा आलोचकका रूपमा उभिएकी छिन् र उनले हालैको अन्तर्वार्तामा ट्रम्पलाई “अमेरिकाको शत्रु” समेत भनेकी थिइन्।