ग्लॉसेस्टर काउन्टी, न्यू जर्सीमा भीषण सवारी दुर्घटना: दुई जनाको मृत्यु, कैयौं घाइते
न्युयोर्क- न्यू जर्सीको ग्लॉसेस्टर काउन्टीमा आइतबार भएको एक गम्भीर सवारी दुर्घटनामा दुई जनाको मृत्यु भएको छ भने कैयौं घाइते भएका छन्।
ग्लॉसेस्टर काउन्टी आपतकालीन व्यवस्थापनका अनुसार दुर्घटना आइतबार दिउँसो ग्लासबोरोस्थित रूट ५५ को एग्जिट ४८ नजिकै भएको हो। न्यू जर्सी राज्य प्रहरीले जानकारी दिएअनुसार दुईवटा सवारी साधन आपसमा ठोक्किँदा कम्तीमा दुई जनाले ज्यान गुमाएका छन्।
यस घटनामा अन्य छ जना घाइते भएका छन्, तर उनीहरूको स्वास्थ्य अवस्था सार्वजनिक गरिएको छैन।
हाल दुर्घटनाको कारण र थप विवरणबारे अनुसन्धान जारी छ। उत्तरतर्फ जाने रूट ५५ को माइल-मार्कर ४७.१ मा सडक अवरुद्ध भएकाले यातायात प्रभावित बनेको छ। अधिकारीहरूले एल्क टाउनशिप, क्लेटन र ग्लासबोरो क्षेत्रमा सवारी जाम हुन सक्ने चेतावनी दिएका छन्। दुर्घटनास्थल हटाउने कार्य तीव्रगतिमा भइरहेको छ।
