एंड्रयू कुओमो काण्ड: न्यूयोर्क राज्यलाई कानुनी खर्चमा ६० मिलियन डलरको भार

न्यूयोर्क- न्यूयोर्कका पूर्व गभर्नर एंड्रयू कुओमोका काण्डहरूले न केवल उनको पद गुमायो, बरु राज्यका करदाताहरूलाई करिब ६० मिलियन डलर बराबरको कानुनी खर्चको भार समेत थपिएको छ। न्यूयोर्क राज्यका लेखा परीक्षक टम डिनापोलीको कार्यालयले हालै सार्वजनिक गरेको विवरणअनुसार यो रकम विभिन्न कानुनी फर्महरूलाई तिरेको हो।

डिनापोलीको कार्यालयका अनुसार राज्य सरकारले कुओमो र उनका शीर्ष सल्लाहकारहरूलाई नागरिक यौन उत्पीडन मुद्दामा बचाउ गर्न १८ मिलियन डलर कानुनी शुल्क तिरिसकेको छ।

यसैगरी, न्यूयोर्क राज्य प्रहरी, गभर्नर कार्यालय (एक्जिक्युटिभ च्याम्बर) र स्वास्थ्य विभागलाई समेत जाँच तथा मुद्दाहरूमा कानुनी सहयोग गर्न लाखौं डलर खर्च गरिएको छ। यीमध्ये ६.६ मिलियन डलर क्लेरी गोटलिब (Cleary Gottlieb) नामक फर्मलाई दिइएको छ, जसले कुओमोको प्रतिरक्षा नभइ, अटर्नी जनरल लेटिटिया जेम्सको अनुसन्धान सहयोगका लागि काम गरेको कुओमोका प्रवक्ता रिच अज़ोपार्डीले दाबी गरेका छन्।

ठूला कानुनी खर्चहरू:
– ९ मिलियन डलर: चार्लोट बेनेटद्वारा दायर गरिएको मुद्दामा कुओमो र उनका शीर्ष सहयोगीहरूको बचाउमा।
– २५६,००० डलर: ब्रिटनी कमिसोको मुद्दामा।
– ८.६ मिलियन डलर: “ट्रूपर १” नाम दिइएको संघीय मुद्दामा कानुनी खर्च।

“ट्रूपर १” मुद्दामा कुओमो पक्षले गरेको कानुनी प्रक्रिया “अत्यधिक आक्रामक” रहेको भन्दै केही अदालत फाइलिङहरूले चिन्ता व्यक्त गरेका छन्। कुओमो पक्षले गत डिसेम्बरमा सामान्यतः १० जना साक्षी हुने प्रक्रियामा ३० जना गैर-पक्षहरूलाई समेत बयान दिन बोलाउन खोजेको आरोप छ।

कानुनी खर्च अझै बढ्ने देखिएकाले केही नेताहरू लेखा परीक्षक डिनापोलीसँग कुओमोको कानुनी बचाउका लागि करदाताबाट थप रकम दिन रोक लगाउन माग गरिरहेका छन्। “Common Cause” र “Harassment Free New York” समूहका नेतृहरू सुजन लर्नर र एरिका ब्लाडिमरले फेब्रुअरी ११ मा पत्र लेख्दै करदाताको पैसाको दुरुपयोग रोक्न आग्रह गरेका छन्।

तर, दुई सरकारी स्रोतहरूका अनुसार यो खर्च रोक्न गाह्रो छ किनभने अदालतले कानुनी शुल्क राज्यले व्यहोर्ने निर्णय गरिसकेको छ।