त्रिवेणी टाइम्सद्वारा समाजसेवी बिसुन्के सम्मानित

न्युयोर्क— ११५ औं अन्तर्राष्ट्रिय महिला दिवसको अवसरमा त्रिवेणी टाइम्सद्वारा आयोजित शुभकामना तथा सम्मान कार्यक्रम भव्य रूपमा सम्पन्न भएको छ। हरेक दिन समाजलाई प्रेरित गर्ने असाधारण महिलाहरूलाई सम्मान गर्दै उनीहरूलाई सशक्त बनाउने उद्देश्यले त्रिवेणी टाइम्सले यस कार्यक्रमको आयोजना गर्दै आएको छ।

त्रिवेणी टाइम्सका संस्थापक नवराज केसी र सह-संस्थापक खेम भट्टले महिलाहरूको शक्ति, धैर्य तथा उल्लेखनीय उपलब्धिहरूलाई सम्मान गर्न यस्ता कार्यक्रम प्रत्येक वर्ष आयोजना गर्ने प्रतिबद्धता समेत व्यक्त गरे। उनीहरूले महिलाहरू तथा सामाजिक क्षेत्रमा योगदान दिने व्यक्तिहरूलाई उजागर गर्दै समाजमा उनीहरूको भूमिकालाई अझ मजबुत बनाउन यस्ता पहल आवश्यक रहेको उल्लेख गरे।

कार्यक्रममा ९ जना विशिष्ट महिलाहरू तथा सामाजिक क्षेत्रमा उल्लेखनीय योगदान दिने व्यक्तिहरूलाई सम्मान प्रदान गरिएको थियो। साथै, कुईन्स बोरो न्युयोर्क सहर कार्यालयका प्रेसिडेन्ट डोनोवन रिचार्ड्स जुनियरद्वारा समाजसेवी डा. शंकर बिसुन्केलाई सम्मानपत्रद्वारा सम्मानित गरिएको थियो।

अमेरिकाको न्यूयोर्कमा बसोबास गर्दै आएका डा. शंकर बिसुन्के लामो समयदेखि सामाजिक कार्यमा क्रियाशील रहँदै आएका छन्। उनी विभिन्न संघसंस्थामा समेत सक्रिय भूमिका निभाउँदै समाजसेवामा निरन्तर योगदान दिइरहेका छन्।