नेपाल प्रहरीसम्बन्धी विधेयकबारे न्यूयोर्कमा छलफल
न्युयोर्क- नेपाल प्रहरीसम्बन्धी विचाराधीन विधेयकका सम्भावित नकारात्मक प्रभावबारे सचेतना फैलाउने उद्देश्यले न्यूयोर्कलगायत विभिन्न स्थानमा पत्रकार तथा समाजसेवीहरूसँग छलफल गरिएको छ। न्यूयोर्कको ज्याक्सन हाइटस्थित एभरेस्ट सेन्टरमा आयोजित कार्यक्रममा संघीयताको नाममा प्रदेश प्रहरी गठन गर्दा राष्ट्रिय सुरक्षामा पर्न सक्ने असरबारे छलफल भएको थियो।
कार्यक्रममा समाजसेवी टेक गुरुङले संघीयतामा प्रदेश सरकार मातहत प्रहरी हुँदा सहज हुने तर्क राखे भने, वक्ताहरूले नेपाल र अन्य देशहरूको परिस्थितिमा ठूलो भिन्नता रहेको उल्लेख गर्दै नेपालको वास्तविकताअनुसार प्रहरी संरचना निर्धारण गर्नुपर्नेमा जोड दिए।
प्रहरी समायोजनको कानुनी जटिलता, संघीय र प्रदेश प्रहरीबीचको तालमेल, अपराध अनुसन्धानका लागि प्रविधिको आवश्यकता तथा प्रहरी परिचालनको सम्भावित राजनीतिकरणबारे विस्तृत छलफल भएको थियो। वक्ताहरूले प्रहरीको तलब-सुविधा सुधार, मनोबल वृद्धि र प्रभावकारी कानुनी संरचनाका लागि विधेयक परिमार्जनको आवश्यकतामा जोड दिए।
उक्त कार्यक्रमका प्रमुख व्यवस्थापक केशवराम राई, सुवर्ण शाक्य तथा सम्राट कार्कीलाई धन्यवाद दिँदै, प्रहरीलाई कमजोर होइन, बलियो बनाउने पक्षमा सबै एकजुट हुनुपर्ने धारणा व्यक्त गरिएकाे थियाे।
