उत्तरी भर्जिनियामा आपराधिक गिरोहविरुद्धको अपरेशनमा २०० भन्दा बढी अवैध आप्रवासी पक्राउ
न्युयोर्क — अमेरिकी अध्यागमन तथा सीमा सुरक्षा (ICE) र कानून कार्यान्वयन निकायहरूले उत्तरी भर्जिनियामा सञ्चालन गरिएको विशेष अपरेशन अन्तर्गत २१४ अवैध आप्रवासी अपराधीहरूलाई पक्राउ गरेका छन्। मार्च १ देखि १३ सम्म चलाइएको यो अपरेशन ट्रान्सनेशनल आपराधिक गिरोह, गैंगहरू, तथा आपराधिक गतिविधिमा संलग्न अवैध आप्रवासीहरूलाई लक्षित गरी गरिएको थियो।
ICE वाशिङ्टन, डीसी फिल्ड अफिसका निर्देशक रस हट्टले भने, “आज हाम्रो समुदाय सुरक्षित भएको छ, किनभने हाम्रा सुरक्षाकर्मीहरू जनताको सुरक्षामा खटिएका छन्। यस अपरेशन अन्तर्गत उत्तरी भर्जिनियाका केही खतरनाक अपराधीहरूलाई नियन्त्रणमा लिन सफल भयौं।”
ICE तथा कानून कार्यान्वयन साझेदारहरूले वाशिङ्टन डीसी आसपासका उत्तरी भर्जिनिया क्षेत्रमा सक्रिय कुख्यात आपराधिक गिरोहहरू—MS-13 र 18th Street समुहलाई लक्षित गरेर अपरेशन सञ्चालन गरेका थिए।
ICE होमल्यान्ड सेक्युरिटी इनभेस्टिगेसन वाशिङ्टन, डीसीका कार्यवाहक विशेष एजेन्ट क्रिस्टोफर हेकले भने, “यस अपरेशनमा संलग्न सबै अधिकारीहरूको समर्पण प्रेरणादायी थियो। २१४ आपराधिक आप्रवासीहरूको गिरफ्तारी केवल बलियो साझेदारीका कारण सम्भव भयो।”
ICE का निर्देशक हट्टले गैंग सदस्यहरूलाई चेतावनी दिँदै भने, “हामी गैंग सदस्यहरूलाई एउटा प्रस्ताव दिँदैछौं—तपाईंहरू अमेरिका छोड्नुस्। यदि छोड्नुभएन भने, हामी तपाईंलाई पत्ता लगाउनेछौं, पक्राउ गर्नेछौं र कानूनी कारबाहीको सामना गर्नुपर्नेछ।”
पक्राउ परेकामध्ये केही प्रमुख अपराधीहरू:
– २६ वर्षीय साल्भाडोरियन MS-13 सदस्य, जो पहिले नै घाइते बनाउने तथा चोरीको आरोपमा दोषी ठहर भइसकेका थिए।
– ४६ वर्षीय साल्भाडोरियन आप्रवासी, जो पहिले अमेरिका निष्कासन गरिएका थिए तर फेरि अवैध रूपमा अमेरिका प्रवेश गरेका थिए। उनी विभिन्न आपराधिक गतिविधिमा संलग्न थिए।
– ४० वर्षीय साल्भाडोरियन अपराधी, जसलाई एल साल्भाडोरमा गम्भीर अपराधको आरोपमा खोजी भइरहेको छ।
– ३७ वर्षीय जमैकन आप्रवासी, जो दोस्रो-डिग्री हत्या तथा अपराधको क्रममा हतियार प्रयोगको अभियोगमा दोषी ठहर भइसकेका छन्।
– ४६ वर्षीय मेक्सिकन आप्रवासी, जो नाबालिगसँग अश्लील गतिविधि तथा बाल यौन शोषणको अभियोगमा सजाय भोगिसकेका छन्।
– २७ वर्षीय होन्डुरन आप्रवासी, जो यौन अपराधमा दोषी ठहर भइसकेका छन् र अहिले निष्कासनको प्रक्रियामा छन्।
यस अपरेशनमा FBI, अमेरिकी मार्शल सेवा, ड्रग एनफोर्समेन्ट एडमिनिस्ट्रेसन (DEA), अमेरिकी सीमा सुरक्षा, भर्जिनिया राज्य प्रहरी, भर्जिनिया सुधार विभाग, तथा अन्य सरकारी निकायहरू सहभागी थिए।
ICE ले आगामी दिनमा पनि आपराधिक गिरोह तथा अवैध आप्रवासी अपराधीहरूविरुद्ध कडा कारबाही गर्ने प्रतिबद्धता व्यक्त गरेको छ।
