हत्या र यौन उत्पीडनमा संलग्न आप्रवासी ग्याङ सदस्य शिकागोमा पक्राउ

न्युयोर्क- शिकागो प्रहरी तथा अमेरिकी आप्रवासन तथा भन्सार प्रवर्तन (ICE) को संयुक्त अभियानमा भेनेजुएलाका अवैध आप्रवासी र ‘Tren de Aragua’ ग्याङका सदस्य पेन्ड्रो कोल्मेना्रेसलाई चौथो पटक पक्राउ गरिएको छ। उनलाई पहिलो पटक २०२२ मा बाइडेन प्रशासनको पालामा अमेरिका निकाला गर्ने आदेश दिइएको थियो।

ICE तथा अमेरिकी मार्शल सेवा (U.S. Marshals) को सहयोगमा कोल्मेना्रेसलाई शिकागोको पश्चिमी क्षेत्रमा पक्राउ गरिएको हो। प्रहरीका अनुसार, उनीमाथि एक पूर्वप्रेमिकालाई अपहरण गरी यौन उत्पीडन गरेको आरोप लागेको छ। कोल्मेना्रेसले गत सेप्टेम्बरमा ती महिलालाई बन्दुक देखाएर धम्क्याउँदै अपहरण गरी केही दिनसम्म दुर्व्यवहार गरेको बताइएको छ।

यसअघि, कोल्मेना्रेस गत महिना एक हत्या अनुसन्धानमा संलग्न रहेको भन्दै प्रहरीले नियन्त्रणमा लिए पनि प्रमाण अभावको कारण उनलाई रिहा गरिएको थियो। तर, नयाँ प्रमाणको आधारमा अब अपहरण र यौन उत्पीडनको आरोपमा उनलाई पुनः पक्राउ गरिएको छ।

फेब्रुअरी १७ मा कोल्मेना्रेसलाई २५ वर्षीय हिस्पानिक पुरुषको हत्या सम्बन्धी सोधपुछका लागि पक्राउ गरिएको थियो। प्रहरीका अनुसार, उनलाई हिरासतमा राख्ने पर्याप्त प्रमाण रहेको भए पनि Cook County राज्यका अभियोजनकर्ताहरूले मुद्दा चलाउन अस्वीकार गरे।

यसैबीच, शिकागो प्रहरीले कोल्मेना्रेसलाई अपहरण र यौन उत्पीडनको गम्भीर अभियोग लगाउन चाहेको भए पनि अभियोजनकर्ताहरूले ‘प्रमाण अपूर्ण रहेको’ भन्दै अभियोग दर्ता गर्न अस्वीकार गरे। कोल्मेना्रेसलाई केवल सानो घरेलु हिंसासम्बन्धी मुद्दामा सजाय दिई धरौटीमा रिहा गरिएको थियो। तर, पछिल्लो अनुसन्धानपछि उनको विरुद्ध नयाँ प्रमाण भेटिएको भन्दै ताजा गिरफ्तारी वारन्ट जारी गरियो।

कोल्मेना्रेस सेप्टेम्बर २०२२ मा अमेरिका प्रवेश गरेका थिए। एक आप्रवासन न्यायाधीशले नोभेम्बर २०२२ मा उनलाई देश निकाला गर्ने आदेश दिए पनि उनले अपील प्रक्रिया लामो बनाएर शिकागोमा बसेका थिए।

कोल्मेना्रेसलाई गत वर्ष हथियार सम्बन्धी आरोपमा पक्राउ गरिएको थियो। DHS (Department of Homeland Security) ले उनलाई पक्राउ गरी निकाला गर्न ICE को अनुरोध गरेको थियो। तर, शिकागो रहेको Cook County ले स्यान्क्चुरी नीति को कारण ICE को अनुरोध अस्वीकार गर्यो र उनलाई पुनः रिहा गरियो।

यसअघि, फेब्रुअरी २०२४ मा उनलाई एउटा गाडीको टेललाइट बिग्रिएको आरोपमा पक्राउ गरिएको थियो। अनुसन्धान गर्दा उनले बिना लाइसेन्स र बीमा नभएको गाडी चलाएको खुल्यो।

यस घटनाले शिकागोको स्यान्क्चुरी नीति र अवैध आप्रवासीहरूको सुरक्षा जोखिमप्रति चासो बढाएको छ। कोल्मेना्रेसलाई अब गम्भीर अपराधको आरोपमा अदालतमा पेश गरिने बताइएको छ।