ट्रम्प प्रशासनद्वारा कोलम्बिया विश्वविद्यालयलाई अल्टिमेटम, संघीय कोष कटौतीको चेतावनी

न्युयोर्क – ट्रम्प प्रशासनले कोलम्बिया विश्वविद्यालयलाई कडा अल्टिमेटम दिँदै क्याम्पस नीतिहरूमा ठूला परिवर्तन नगरे स्थायी रूपमा संघीय कोष रोक्ने चेतावनी दिएको छ।

बिहीबार राति पठाइएको पत्रमा, संघीय अधिकारीहरूले विश्वविद्यालयलाई मध्यपूर्व, दक्षिण एसियाली, र अफ्रिकी अध्ययन विभागलाई कम्तीमा पाँच वर्षका लागि ‘शैक्षिक प्रशासनिक निगरानी’मा राख्नुपर्ने माग गरेका छन्। साथै, विद्यार्थीहरूलाई अनुहार छोप्ने मास्क प्रयोग गर्न प्रतिबन्ध लगाउनुपर्ने, यहूदी विरोध (antisemitism) को परिभाषा पुनःनिर्धारण गर्नुपर्ने, र विद्यार्थीहरूलाई कारबाही गर्ने हालको प्रक्रिया खारेज गर्नुपर्ने अल्टिमेटम दिएका छन्।

पत्रमा यी परिवर्तनहरूलाई संघीय कोष पाउने सम्बन्धमा वार्ता सुरु गर्न पूर्वशर्त भनेर उल्लेख गरिएको छ।

“हामी यी आवश्यक कदमहरू तुरुन्तै कार्यान्वयन हुने अपेक्षा गर्छौं,” शिक्षा विभाग, सामान्य सेवा प्रशासन (GSA) र स्वास्थ्य तथा मानव सेवा विभागका अधिकारीहरूले पत्रमा लेखेका छन्।

यो कदमले ट्रम्प प्रशासनले शैक्षिक संस्थाहरूमा कठोर हस्तक्षेप गर्ने प्रयासलाई थप बल दिएको देखिन्छ।
यसैबीच, संघीय आप्रवासन अधिकारीहरूले कोलम्बियाका केही विद्यार्थी प्रदर्शनकारीहरूलाई लक्षित गरेका छन्।

हालै मात्र, प्रो-फिलिस्तिनी कार्यकर्ता महमूद खलिललाई पक्राउ गरिएको छ। उनले इजरायल विरोधी प्रदर्शनहरूमा सक्रिय भूमिका खेलेका थिए।

बिहीबार साँझ, गृह सुरक्षा विभाग (DHS) का अधिकारीहरूले कोलम्बिया विश्वविद्यालयका दुई आवासीय भवनहरूमा खोजी अभियान चलाएका थिए। विश्वविद्यालयका अनुसार, यो अभियानमा कुनै पनि व्यक्ति पक्राउ परेन वा हिरासतमा लिइएन।

कोलम्बिया विश्वविद्यालयका अन्तरिम अध्यक्ष कट्रिना आर्मस्ट्रङले यस घटनालाई दुःखद भन्दै संघीय अधिकारीहरूलाई कानुनी प्रक्रिया पालन गर्न आग्रह गरेकी छिन्।

“हाम्रो क्याम्पस, विद्यार्थी, संकाय सदस्य र कर्मचारीहरू सुरक्षित राख्न हामी प्रतिबद्ध छौँ,” उनले भनेकी छिन्। “कोलम्बिया कानुनको पालना गर्ने संस्थाका रूपमा रहेको छ, र हामी संघीय, राज्य, तथा सहरका अधिकारीहरूबाट पनि यस्तै अपेक्षा गर्छौँ।”

कोलम्बिया विश्वविद्यालयले ट्रम्प प्रशासनका मागहरूप्रति कुनै आधिकारिक प्रतिक्रिया दिएको छैन।