सामाजिक अभियन्ता लकेश श्रेष्ठ न्यूयोर्कमा सम्मानित

न्यूयोर्क- ११५ औं अन्तर्राष्ट्रिय नारी दिवसको विशेष अवसरमा अमेरिकाको प्रतिष्ठित मिडिया हाउस त्रिवेणी टाइम्स द्वारा आयोजित एक समारोहका बीच समाज, राष्ट्र, र नारी हकहितका लागि अतुलनीय योगदान पुर्याउने व्यक्तित्वहरू सम्मानित भएका छन्। सम्मानित हुनेहरूमा डा. जुडिथ नारायण, डा. मरियम सिंह, डा. हेलेन अर्टेगा, श्रेया गिरी, मच्छेदेवी गुरुङ, चेरी एन चिश्ती, सुकरानी धनपत, ग्लेडिस रामिरेज, र तैबा अहमद रहेका छन्। कार्यक्रममा नेपालसहित विभिन्न राष्ट्रका यी ९ प्रभावशाली महिलाहरूलाई विशेष सम्मान प्रदान गरिएको थियो।

उक्त समारोहमा त्रिवेणी टाइम्स विशेष ट्रफी तथा Assembly Member Jenifer Rajkumar को कार्यालयबाट प्रदान गरिने विशेष सम्मान प्रदान गरिएको थियो।

कार्यक्रममा नेपालसहित विभिन्न देशका भेषभूषा, भाषा, कला, र संस्कृतिको झल्को दिने सांस्कृतिक प्रस्तुतिहरूले भरिपूर्ण रहेको थियो। नेपालका वरिष्ठ कलाकारहरू बसन्ती राई, महादेव त्रिपाठी, शिव वि.क., दिनेश सुनार लगायत विभिन्न देशका कलाकारहरूको उत्कृष्ठ प्रस्तुति रहेको थियो।

त्रिवेणी टाइम्सले समुदाय र जनतासँग प्रत्यक्ष सरोकार राख्ने, निष्पक्ष रूपमा जनभावना अनुरूप कार्य गर्ने भरपर्दो संस्था भएकाले समय-समयमा समाज र राष्ट्रका लागि विशेष योगदान पुर्याउने समाजसेवी, बुद्धिजीवी, पत्रकार, तथा विभिन्न क्षेत्रका व्यक्तित्वहरूलाई सम्मान गर्दै आइरहेको छ।

यसै बीच सामाजिक अभियन्ता लकेश श्रेष्ठ Office of the President, Borough of Queens, City of New York को Assembly Member Jenifer Rajkumar को कार्यालयका प्रतिनिधि तथा त्रिवेणी टाइम्सका संस्थापक एवं समाजसेवी नवराज के.सी. मार्फत सम्मानित भएका हुन्।

श्रेष्ठ न्यूयोर्कमा लोकप्रिय सामाजिक अभियन्ताका रूपमा परिचित छन्। मातृभूमि र कर्मभूमिलाई उच्च सम्मान गर्दै, नेपाली-अमेरिकी समाजलाई भावनात्मक रूपमा जोड्नका लागि नेपाली भेषभूषा, भाषा, कला, र संस्कृतिको संरक्षण, संवर्द्धन, तथा प्रवर्द्धन गर्दै विश्वसामु नेपाल चिनाउने अभियानमा उनी निरन्तर लागिपरेका छन्।

सन् २०२२ मा हामी नेपाली ग्लोबलमा आबद्ध श्रेष्ठले सन् २०२३ मा क्यालिफोर्नियाको हलिउडमा आयोजित नेपाल फेस्टिवललाई भव्यरूपमा सफल बनाउन महत्त्वपूर्ण भूमिका निर्वाह गरेका थिए। त्यस्तै, नेपाल फेस्टिवल २०२४ (Niagara Falls) मा समेत श्रेष्ठको उल्लेखनीय योगदान रहेको छ।

श्रेष्ठले समाज र राष्ट्रका लागि पुर्याएको विशेष योगदानको उच्च कदर गर्दै हामी नेपाली ग्लोबल, नारी एकता, त्रिवेणी टाइम्स, दिलकुमारी फाउन्डेसन लगायत विभिन्न संघ-संस्थाहरूले समय-समयमा उनलाई सम्मान गर्दै आएका छन्।

न्यूयोर्कमा हुने सामाजिक गतिविधिहरू दिलकुमारी के.सी. स्मृति फाउन्डेसनसँग सहकार्य गरी सञ्चालन गर्ने गरेका श्रेष्ठ निकट भविष्यमा सबै संघ-संस्थासँग सहकार्य गर्दै सामाजिक कार्यहरूलाई अझ विस्तार गर्ने योजनामा छन्।

विभिन्न संघ-संस्थामा आबद्ध रही समाज तथा राष्ट्रका लागि विशेष योगदान पुर्याउँदै आएका श्रेष्ठ त्रिवेणी टाइम्सका संवाददाताका रूपमा पनि कार्यरत रहेका छन्। उनको योगदानको उच्च मूल्यांकन गर्दै यसपटक विशेष सम्मान प्रदान गरिएको हो।