क्विन्सस्थित एक घरमा दुई जनाको शव फेला
न्युयोर्क- क्विन्सस्थित एक घरमा दुई जनाको शव फेला परेको र घटनाको अनुसन्धान भइरहेको छ।
८०औँ स्ट्रीटमा रहेको घरमा गोली चलेको सूचना पाएपछि प्रहरी घटनास्थलमा पुगेको थियो। त्यहाँ ५७ वर्षीय पुरुषको टाउकोमा गोली लागेको अवस्थामा शव भेटिएको थियो। घटनास्थलमै उनलाई मृत घोषणा गरिएको थियो।
त्यसैगरी, त्यही घरमा ८८ वर्षीया वृद्धा पनि मृत अवस्थामा फेला परेकी छिन्। उनलाई गोली लागेको भने थिएन। उनको मृत्युको कारण मेडिकल परीक्षक कार्यालयले निर्धारण गर्नेछ।
घटनास्थलबाट एउटा बन्दुक बरामद गरिएको छ। मृतकहरूको परिचय सार्वजनिक गरिएको छैन। प्रहरी अनुसन्धान जारी रहेको छ।
