संघीय न्यायाधीशद्वारा ट्रम्प प्रशासनको छिटो निष्कासन गर्ने अधिकार अस्थायी रूपमा रोक्का

वासिङटन- संघीय न्यायाधीशले ट्रम्प प्रशासनलाई “एलियन एनेमीज एक्ट” प्रयोग गरी केही आप्रवासीहरूलाई तुरुन्तै निष्कासन गर्नबाट अस्थायी रूपमा रोक लगाएका छन्। विशेष रूपमा, न्यायाधीशले अमेरिकी अधिकारीहरूले भेनेजुएलाको गिरोह “Tren de Aragua” सँग सम्बन्धित भएको आरोप लगाएका आप्रवासीहरूको निष्कासन रोक्न आदेश दिएका हुन्।

शनिबार प्रारम्भमा, ट्रम्प प्रशासनले सन् १७९८ को “Alien Enemies Act” लागू गर्दै, ती आप्रवासीहरूलाई छिटो निष्कासन गर्न आदेश दिएको थियो। उक्त कानुन केवल युद्धको समयमा वा कुनै विदेशी राष्ट्रले अमेरिका आक्रमण गर्ने खतरा उत्पन्न गराएको अवस्थामा राष्ट्रपति द्वारा प्रयोग गर्न मिल्नेछ।

न्यायालयको आदेश

डिसीस्थित संघीय अदालतका प्रमुख न्यायाधीश जेम्स बोसबर्गले ट्रम्प प्रशासनलाई पाँच जना आप्रवासीहरूको निष्कासन रोक्न आदेश दिएका थिए। पछि, आकस्मिक रूपमा बोलाइएको सुनुवाइपछि उनले उक्त आदेशलाई व्यापक बनाएर, सम्पूर्ण गैर-नागरिकहरूलाई समेट्ने गरी प्रशासनको कदम रोक्न आदेश दिए।

न्यायाधीश बोसबर्गले आफ्नो आदेशमा भने, “”विशेष गरी, सरकारद्वारा चुनौती नगरिएको वादीहरूको जानकारीका आधारमा, आप्रवासीहरू बोकेका विमानहरू उड्न वा अवतरण गर्न लागेका छन्। त्यसैले म प्रतिक्षा गर्न सक्दिन। जोसुकैको निष्कासनका लागि उडिरहेको विमान भए, त्यो फर्काउनुपर्छ।””

उनको आदेशअनुसार, यो अस्थायी प्रतिबन्ध १४ दिनसम्म लागू हुनेछ, वा अदालतले अर्को आदेश नदिएसम्म जारी रहनेछ।

न्याय विभागको अपील

ट्रम्प प्रशासनको कदम रोक्न जारी आदेशविरुद्ध अमेरिकी न्याय विभागले डिसी सर्किट कोर्ट अफ अपील्समा पुनरावेदन गरेको छ।

शनिबार सार्वजनिक गरिएको राष्ट्रपति ट्रम्पको घोषणामा, ह्वाइट हाउसले Tren de Aragua गिरोहलाई “विदेशी आतंकवादी संगठन” को रूपमा वर्गीकृत गरेको उल्लेख गर्दै, उनीहरूलाई अमेरिका विरुद्धको असमान युद्ध र शत्रुतापूर्ण गतिविधिमा संलग्न भएको आरोप लगाएको थियो। घोषणामा उल्लिखित मापदण्डअनुसार, ती आप्रवासीहरूलाई तुरुन्तै गिरफ्तार, हिरासत, र निष्कासन गर्नुपर्ने भनिएको थियो।

इतिहासमा तेस्रो पटक लागू गरिने प्रयास

“Alien Enemies Act” अमेरिकी इतिहासमा जम्मा तीन पटक मात्र प्रयोग गरिएको छ, त्यो पनि युद्धको समयमा। पहिलोपटक पहिलो विश्वयुद्ध, दोस्रो विश्वयुद्धको बेला जर्मन, अष्ट्रो-हंगेरीयन, इटालियन, तथा जापानी आप्रवासीहरूको हिरासत र निष्कासनका लागि यसको प्रयोग गरिएको थियो। द्वितीय विश्वयुद्धको समयमा जापानी-अमेरिकी नागरिकहरूलाई जबरजस्ती हिरासतमा राख्ने अमेरिकी नीति समेत यसै कानुनअन्तर्गत कार्यान्वयन गरिएको थियो।

ट्रम्प प्रशासनको आदेश रोक्न, “American Civil Liberties Union (ACLU)” र “Democracy Forward” संस्थाहरूले तत्काल अदालतमा अपिल गरेका थिए। एसीएलयूले दावी गरेको थियो कि Tren de Aragua गिरोहको गतिविधि “आक्रमण” को परिभाषाभित्र नपर्ने भएकाले ट्रम्प प्रशासनले यो कानुन प्रयोग गर्न नमिल्ने तर्क अदालतसमक्ष पेश गरेको थियो।

यस मुद्दामा अर्को सुनुवाइ यसै महिनाको अन्त्यमा हुने तय भएको छ।