२२ चैत्र २०८१, शुक्रबार
4 April 2025, Friday

न्यूयोर्कमा ईमानसिङ चेम्जोङको जीवनीमा आधारित वृत्तचित्रको प्रदर्शन

न्यूयोर्कमा ईमानसिङ चेम्जोङको जीवनीमा आधारित वृत्तचित्रको प्रदर्शन

न्यूयोर्क – अमेरिकाको न्यूयोर्कमा इतिहासकार स्वर्गीय ईमानसिङ चेम्जोङको जीवनीमा आधारित भएर निर्माण गरिएको वृत्तचित्र प्रदर्शन गरिएको छ।

मार्च ९, २०२५ मा ईमानसिङ चेम्जोङ मेमोरियल फाउन्डेसन प्रस्तुति तथा किराँत याक्थुङ चुम्लुङ अमेरिका र चेम्जोङ वंश अमेरिकाको व्यवस्थापनमा प्रदर्शन गरिएको हो।

सेन्सेलुङ पतङ्वा र बुद्ध चेम्जोङको निर्माणमा बनेको उक्त वृत्तचित्र ४५ मिनेट लामो रहेको छ।

लिम्बु समुदायमा स्व. चेम्जोङको योगदानलाई अझ व्यापक रूपमा प्रचार गर्न यो वृत्तचित्र निर्माण गरिएको हो। न्यूयोर्कसहित न्यूजर्सीमा बसोबास गर्ने सयौं नेपालीहरूले वृत्तचित्र हेरेका थिए।

आगामी दिनमा यो वृत्तचित्र विभिन्न देशहरूमा पनि प्रदर्शन गरिने कार्यक्रम संयोजक तथा चेम्जोङ वंश अमेरिकाका महासचिव गजेन चेम्जोङ ले जानकारी दिए।

ग्याल सुम्दो सेवा संस्था हल, न्यूयोर्कमा एक कार्यक्रम पश्चात वृत्तचित्र प्रदर्शन गरिएको थियो। किरात याक्थुङ चुम्लुङ अमेरिकाका अध्यक्ष दीपक थेबेका अनुसार वृत्तचित्र प्रदर्शनीबाट संकलित टिकट रकमको आधा हिस्सा किरात याक्थुङ चुम्लुङ अमेरिकाको कोष वृद्धिका लागि प्रदान गरिएको छ।

स्व. ईमानसिङ चेम्जोङ नेपाल सरकारले राष्ट्रिय विभूति घोषणा गरिसकेका व्यक्तित्व हुन्। नेपाल सरकारले उनको सम्मानमा हुलाक टिकटसमेत प्रकाशित गरिसकेको छ।