तीन नेपाली अमेरिकाबाट निष्कासित

न्युयोर्क- मेरिकाले पुनः तीन नेपालीलाई निष्कासन गरेको छ। यो क्रमले गैरकानुनी रूपमा बसोबास गर्ने विदेशीहरूमाथि अमेरिकी सरकारको कडा नीति पुनः स्पष्ट पारेको छ। निष्कासनमा पर्ने नेपालीहरू गोपाल ठकुरी, राजकुमार रोका र राहुल थापा क्षेत्री रहेका छन्, जसलाई गत साता नेपाल फिर्ता गरिएको स्रोतले जनाएको छ।

गोपाल ठकुरी र राजकुमार रोकालाई अमेरिकी अध्यागमन अधिकारीहरूले गैरकानुनी रूपमा बसोबास गरेको आरोपमा पक्राउ गरी एयर इन्डियामार्फत भारत हुँदै नेपाल पठाइएको हो। यस्तै, पर्यटक भिसामा अमेरिका गएका राहुल थापा क्षेत्रीलाई लुकीछिपी बसोबास गरेको आशंकामा पक्राउ गरी सिंगापुर एयरलाइन्समार्फत नेपाल फर्काइएको छ।

अघिल्लो हप्तामात्रै यमप्रसाद तिवारी, घनश्याम खत्री र भुपाल विकलाई गैरकानुनी बसोबासको आरोपमा निष्कासन गरिएको थियो। त्यस्तै, माघको पहिलो सातामा शेर शाङ्बु शेर्पा र सारुन श्रेष्ठ पनि अध्यागमन कानुन उल्लंघन गरेको आरोपमा नेपाल फर्काइएका थिए।

राष्ट्रपति डोनाल्ड ट्रम्पको प्रशासनले आप्रवासन नीतिलाई कडा बनाउँदै गैरकानुनी रूपमा अमेरिका बस्दै आएका विदेशी नागरिकहरूलाई धमाधम पक्राउ गरी निष्कासन गरिरहेको छ। अफ्रिकी र अन्य मुलुकका आप्रवासीहरूलाई अमेरिकी सेनाको जहाजमार्फत देश फिर्ता पठाइएका खबरहरू आएका छन्।

हालै प्रकाशित रिपोर्टअनुसार, अमेरिकी अदालतले १,३६५ नेपालीलाई देश छोड्न आदेश दिएको छ। नेपालका लागि टेम्पररी प्रोटेक्टेड स्टेटस (TPS) नवीकरण नभएमा यो संख्या ३,००० सम्म पुग्ने अनुमान गरिएको छ।

अमेरिकामा गैरकानुनी रूपमा बस्ने नेपालीहरूको संख्या बढ्दै गइरहे पनि ट्रम्प प्रशासनको कडा नीतिले उनीहरूको जीवनलाई जटिल बनाएको छ। निष्कासनपछि नेपाल फर्किएकाहरूले यहाँ नयाँ जीवन सुरु गर्न आर्थिक र सामाजिक कठिनाइ झेल्नु परेको छ।

अमेरिकाले गैरकानुनी रूपमा बसिरहेका नेपालीहरूमाथि कारबाही गर्दै निष्कासनको संख्या बढाउँदै लगेको छ। यो अवस्थामा नेपाली आप्रवासीहरू सचेत हुनुका साथै नेपाल सरकारले पनि आफ्नो भूमिका प्रभावकारी बनाउन आवश्यक देखिन्छ।