न्यूयोर्क, लङ आइल्याण्डमा भव्य रूपमा होली सम्पन्न, सीसीएनसीयूएसए द्वारा आभार व्यक्त
लङ आइल्याण्ड, न्यूयोर्क – नेपाली समुदायको उत्साहजनक सहभागितामा फागु पूर्णिमा (होली)पर्व भव्य रूपमा सम्पन्न भएको छ। अयस्टर वे नगरपालिका तथा निरीक्षक जोसेफ सलाडिनोको आयोजनामा, अमेरिकन नेपाली समुदाय समन्वय समिति (सीसीएनसीयूएसए) सहित सातवटा संघसंस्थाको सहकार्यमा हिक्सभिल समुदाय हलमा कार्यक्रम सम्पन्न भएको हो।
कार्यक्रममा नेपाली समुदायको उल्लेखनीय सहभागिताले नेपाली संस्कृति र परम्परालाई उजागर गर्नुका साथै कर्मभूमि अमेरिकामा आपसी एकता र सहकार्यलाई सुदृढ बनाएको आयोजकहरूले बताएका छन्। सीसीएनसीयूएसएले कार्यक्रम आयोजना गर्न सहयोग पुर्याउने अयस्टर वे नगरपालिका, निरीक्षक जोसेफ सलाडिनो तथा ह्यारी माल्होत्रालाई विशेष धन्यवाद व्यक्त गरेको छ।
त्यस्तै उत्तर हेम्पस्टेड नगरका लेखक रागिनी श्रीवास्तव, निरीक्षक जेनिफर डेसेना, अयस्टर वे नगरपरिषद् सदस्य एन्ड्र्यु मोन्टेलेओन लगायत सम्पूर्ण निर्वाचित पदाधिकारीहरूलाई पनि आभार व्यक्त गरिएको छ।
कार्यक्रममा नेपाली समुदायका अगुवा नेता तथा समाजसेवीहरू टिकाराज ढकाल, मोहन क्षेत्री, शंकर भण्डारी, विदुर सापकोटा, लक्ष्मी सुवेदी, पम्फा भण्डारी, राजेन्द्र केसी लगायतको उपस्थिति थियो। नेपाली समुदायतर्फबाट कार्यक्रमको संयोजन विशाल रेग्मीले गरेका थिए।
होली महोत्सवको मुख्य आकर्षण नेपाली समुदायका बालबालिकाहरूको सांस्कृतिक नृत्य थियो। संकल्पा क्षेत्री, दिया क्षेत्री, र प्रिसा ढकालले प्रस्तुत गरेकाे नृत्यले नेपाली संस्कृतिको पहिचान झल्काएको थियो।
सीसीएनसीयूएसएका अध्यक्ष बाबुराम शर्माले कार्यक्रममा सहभागी सबैलाई स्वागत गर्दै नेपाली संस्कृतिलाई प्रवद्र्धन गर्ने अवसर प्रदान गरेकोमा अयस्टर वे नगरपालिकालाई धन्यवाद व्यक्त गरे।
अयस्टर वे नगरपालिकाले सीसीएनसीयूएसएको सिफारिसमा नेपाली समुदायका समाजसेवी लक्ष्मी थापा र निर्मल थपलियालाई सम्मानित गरेको छ। नेपाली समुदायको योगदानलाई स्थानीय सरकारी निकायबाट सम्मानित गरिनु गर्वको विषय भएको आयोजकहरूले बताएका छन्।
