अमेरिका र रुसबीच युक्रेनबारे साउदी अरबमा वार्ता सुरु
वासिङटन- अमेरिकी र रुसी अधिकारीहरूले सोमबार साउदी अरबमा युक्रेन युद्धमा आंशिक युद्धविरामको सम्भावनाबारे वार्ता सुरु गरेका छन्। अमेरिकी राष्ट्रपति डोनाल्ड ट्रम्पले युद्धको छिटो अन्त्य गर्न जोड दिइरहेका छन्, जबकि दुबै पक्षले भिन्न योजना अघि सारेका छन्।
रक्षामन्त्री रुस्तम उमरोभ नेतृत्वको युक्रेनी टोलीले अमेरिकी सेनासँग वार्ता गरी ऊर्जा र सुरक्षा विषयमा छलफल गरेको छ। ट्रम्पका दूत स्टिभ विटकोफका अनुसार वार्ताको प्राथमिक चरणमा ‘ब्ल्याक सी’ हुँदै मालबाहक जहाजको आवागमनबारे छलफल हुनेछ, जसले पूर्ण युद्धविरामको आधार तयार गर्न सक्छ।
रुसी राष्ट्रपति पुटिनले तुरुन्तै ३०-दिनको वार्ता प्रस्ताव अस्वीकार गरेका छन्। क्रेमलिनका प्रवक्ता पेस्कोभले वार्ताको सुरुआत मात्र भएको र ब्ल्याक सी सम्झौतामा केन्द्रित रहने बताएका छन्।
यसैबीच, युद्ध जारी रहँदा रुसी ड्रोन आक्रमणले किएभमा सर्वसाधारणको ज्यान लिएको छ। युक्रेनी राष्ट्रपति जेलेन्स्कीले सहयोगी राष्ट्रहरूलाई मस्कोमाथि थप दबाब सिर्जना गर्न आग्रह गरेका छन्।
