न्युयोर्कको एक गहना पसलमा स्लेजह्यामर प्रयोग गरी लुटपाट गर्ने दुई जना पक्राउ
न्युयोर्क- न्यु जर्सीका दुई व्यक्तिलाई २०२४ मा न्युयोर्कको एउटा गहना पसलमा स्लेजह्यामर प्रयोग गरी $१.७ मिलियन बराबरका गहना, हिरा र लक्जरी घडीहरू लुटेको आरोपमा पक्राउ गरिएको छ।
अमेरिकी संघीय अभियोजकहरूका अनुसार, २६ वर्षीय केभिन विलियम्स र २४ वर्षीय बायरन विल्सनलाई “हब्स एक्ट डकैती” को आरोप लगाइएको छ, जसको सजाय अधिकतम २० वर्ष जेल हुनसक्छ।
प्रहरीका अनुसार, डिसेम्बर १६, २०२४ मा यी अभियुक्तहरू दुई अन्य सहअपराधीसँग मिलेर न्यु जर्सीबाट चोरीको कार लिएर न्युयोर्कको वेस्टचेस्टर काउन्टी पुगे। बिहान ११ बजेपछि उनीहरूले हार्ट्सडेलस्थित वेस्टचेस्टर स्क्वायर सपिङ प्लाजामा रहेको गहना पसलमा प्रवेश गरी ग्राहकहरूको अगाडि नै स्लेजह्यामर प्रयोग गरेर शोकेस फुटाए।
उनीहरूले ७० वटा रोलेक्स घडीसहित $१.७ मिलियन बराबरको गहना र हिराहरू लुटेका थिए। त्यसपछि उनीहरू चोरीको गाडी लिएर न्यु जर्सी फर्किए। अनुसन्धानकर्ताहरूका अनुसार, विलियम्स सोही दिन न्युयोर्क सिटीको डायमन्ड डिस्ट्रिक्ट पुगे भने विल्सन उनीहरूको घर फर्किए। केही घण्टापछि यी दुई अभियुक्तहरू अन्य सहअपराधीसँगै न्यूआर्कमा ठूलो रकमको नगद बोकेर हाँसिरहेको फोटो खिचिरहेका थिए।
फेडरल अधिकारीहरूले उनीहरूलाई मोबाइल लोकेसन र सर्भेलेन्स क्यामेरा मार्फत पत्ता लगाएका थिए। तीन महिनाभन्दा बढी समयसम्म प्रहरी निगरानीबाट उम्किन सफल यी अभियुक्तहरू अन्ततः मंगलबार पक्राउ परेका हुन्।
“यी अभियुक्तहरूले दिउँसो नै हिंस्रक रूपमा गहना पसल लुटे, ग्राहक र कर्मचारीहरू डरले लुक्न बाध्य भए,” संघीय अभियोजक म्याथ्यु पोडोल्स्कीले भने। “यस्ता अपराध गर्नेहरूलाई हामी पत्ता लगाएर कारबाही गर्नेछौँ।”
गहना पसलका व्यवस्थापनले गिरफ्तारीबारे जानकारी भए पनि कुनै टिप्पणी गर्न चाहेनन्।
