बोस्टनमा ट्रम्प प्रशासनको कारबाहीः ३७० आप्रवासी पक्राउ

न्युयोर्क- ट्रम्प प्रशासनका सीमा सुरक्षा सल्लाहकार टम होमन ले बोस्टनमा एक हप्तासम्म चलेको कारबाहीमा ३७० आप्रवासी पक्राउ परेको बताएका छन्। उनले सामाजिक सञ्जालमा पोस्ट गर्दै यस अभियानमा ICE, FBI, DEA, ATF, U.S. मार्शल्स, र डिप्लोम्याटिक सेक्युरिटी सेवा संलग्न रहेको बताए।

पक्राउ परेकामध्ये अधिकांश गम्भीर अपराधीहरू रहेको उनले उल्लेख गरे। तीमध्ये ६ जना अन्तर्राष्ट्रिय फौजदारी अपराधमा संलग्न व्यक्ति थिए, जसमध्ये ४ जनालाई हत्या सम्बन्धी आरोप थियो। अन्य केही व्यक्ति मादक पदार्थ तस्करी, बाल यौन दुर्व्यवहार, र अन्य हिंसात्मक अपराधहरूमा संलग्न थिए।

होमनले बोस्टनका मेयर मिशेल वु र गभर्नर मौरा हीली लाई “सङ्कटपूर्ण आप्रवासन नीतिहरूको समर्थन गरेको” भन्दै आलोचना गरे। उनले भने, “राष्ट्रपति ट्रम्पको ‘Worst First’ नीति सफल हुँदैछ, जसले हाम्रो समाजलाई सुरक्षित बनाइरहेको छ। अझै धेरै गर्न बाँकी छ, तर हामी पूरा गर्नेछौं।”

मेयर वुले भने बोस्टनलाई ‘डेमोक्रेसीको केन्द्र’ बताउँदै, ट्रम्प प्रशासनको नीतिलाई “डराउने रणनीति” भन्दै विरोध गरिन्। उनले भने, “बोस्टन ३९५ वर्षदेखि अन्यायको विरुद्ध लड्दै आएको छ, र अब पनि रोकिँदैन।”

ICE को अनुसार, यस कारबाहीमा MS-13, Tren de Aragua, Trinitarios र 18th Street ग्याङहरूमा संलग्न अपराधीहरूलाई लक्षित गरिएको थियो। साथै, ४४ किलोग्राम मेथाम्फेटामिन, ५ किलोग्राम फेन्टानिल, १.२ किलोग्राम कोकेन, तीनवटा हतियार, र गोलाबारुद पनि बरामद गरिएको छ।