न्यूयोर्कमा घरभित्रै दुई महिला बाँधेर लुटपाट, $१ मिलियनभन्दा बढी सम्पत्ति चोरी

न्यूयोर्क – क्विन्सस्थित एक घरमा पाँच जना लुटेराहरू जबरजस्ती प्रवेश गरी दुई महिलालाई बाँधेर करिब ११ लाख डलर बराबरको गरगहना, लुगा तथा अन्य बहुमूल्य सामग्री लुटेर फरार भएका छन्।

मार्च १९, साँझ ५:३० बजे, कीव गार्डेन्सस्थित मेफेयर रोड र ११६ औं स्ट्रीटनजिक रहेको उक्त घरमा आक्रमण भएको न्यूयोर्क प्रहरी (NYPD) ले जनाएको छ। सुरक्षाक्यामेराको फुटेजमा नानी (गृहसहायक) ले फोहोर फालेर फर्किंदै गर्दा लुटेराहरूले उनीमाथि आक्रमण गरेको देखिएको छ।

लुटेराहरू घरभित्र पसेर ५३ वर्षीय नानीलाई भुइँमा घोप्ट्याएर बाँधिदिएका थिए, साथै ३६ वर्षीया गृहस्वामिनीलाई पनि टेपले बाँधेर नियन्त्रणमा लिएका थिए। घटनाका बेला ती आमाको ६ वर्षीया छोरी जागा थिईन्, भने उनका अरू दुई छोरा निदाइरहेका थिए।

“पहिला उनीहरूले मलाई कोठामा थुने। त्यसपछि मेरी छोरीको चिच्याएको आवाज सुनेँ। त्यसैले ढोका ठोक्न थालेँ। अन्ततः, मलाई कोठाबाट निकालेर छोरीसँगै बस्न दिए,” पीडित आमाले बताइन्।

लगभग एक घण्टासम्म ती मुखुण्डो लगाएका लुटेराहरू घरभरि भएका बहुमूल्य सामान संकलन गर्न व्यस्त रहे। प्रहरीका अनुसार, Chanel, Louis Vuitton र Birkin ब्रान्डका महँगा झोला, चित्रकला (पेन्टिङ्स) तथा महिलाको विवाहको औँठीसहित करिब $१,१०५,००० बराबरको धनमाल लुटिएको छ।

त्यसपछि लुटेराहरू छैटौं व्यक्तिद्वारा चलाइएको सेतो २०२१ टोयोटा RAV4 कारमा भागेको जनाइएको छ।

चोरहरू गएपछि पीडित महिलाहरूले एकअर्कालाई बाँधबाट छुटाएर प्रहरीलाई खबर गरे। पीडित आमाले भनिन्, “उनीहरू मेरा बहुमूल्य सामानमात्र होइन, हाम्रो सुरक्षाको अनुभूति पनि लुटेर लगे। मेरी छोरी रातभरि सुत्न सक्दिन, उसलाई कसरी सम्हाल्ने भन्ने थाहा छैन।”

भाग्यवश, घटनामा कुनै घाइतेको रिपोर्ट आएको छैन।

प्रहरीले लुटेराहरूको सुरक्षाक्यामेरामा कैद भएको फुटेज सार्वजनिक गरेको छ। जोसुकैसँग पनि घटनासम्बन्धी जानकारी भए १-८००-५७७-TIPS मा सम्पर्क गर्न प्रहरीले अनुरोध गरेको छ।