आई-८० मा देखिएको भ्वाङका कारण न्यू जर्सी राजमार्ग कम्तीमा पाँच हप्ता अझै बन्द रहने

न्युयोर्क- न्यू जर्सीका चालकहरूले थप यातायात समस्याको सामना गर्नुपर्ने भएको छ, किनकि आई-८० राजमार्गमा देखिएका भ्वाङहरूका कारण यो सडक कम्तीमा पाँच हप्ता अझै मर्मत कार्यका लागि बन्द रहनेछ।

न्यू जर्सी यातायात विभागका अनुसार, व्हार्टन क्षेत्रमा पर्ने उक्त राजमार्ग एक हप्ताभन्दा बढी समयदेखि बन्द छ। शुक्रबार DOT ले दिएको जानकारीअनुसार, राजमार्गको पश्चिमतर्फको बायाँ लेन मुनि ठूलो खाली भाग फेला परेको छ। उक्त खाली भागको जोखिमका कारण, पश्चिमतर्फ जाने सम्पूर्ण लेनहरू अझै केही समयसम्म बन्द रहने र यातायातलाई एक्सिट ३४बी बाट डाइभर्ट गरिनेछ।

DOT का अनुसार, मर्मत कार्यको डिजाइन अप्रिलको पहिलो सातासम्म अन्तिम रूप दिइनेछ र त्यसपछि काम सुरु गरिनेछ। योजना सफलतापूर्वक कार्यान्वयन भएमा, करिब पाँच हप्तामा पश्चिमतर्फका दुई लेन पुनः खोल्न सकिनेछ, जबकि बाँकी लेनहरू थप केही समयपछि मात्र खुल्नेछन्।

पूर्वतर्फका दुई लेनको मर्मत कार्य करिब सात हप्तामा सम्पन्न भई पुनः सञ्चालनमा आउने अनुमान गरिएको छ।

न्यू जर्सीका गभर्नर फिल मर्फीले भने, “हामी २४/७ निरन्तर मर्मत कार्य गरिरहेका छौँ। दुर्भाग्यवश, परीक्षणका क्रममा आई-८० पश्चिमतर्फको बायाँ लेन मुनि अर्को ठूलो खाली भाग फेला परेको छ। यस संकट सुरुदेखि नै हामीले स्पष्ट रूपमा भनेका छौँ— यात्रुको सुरक्षालाई हाम्रो पहिलो प्राथमिकतामा राख्नुपर्छ, त्यसैले सडक पूर्ण रूपमा सुरक्षित नभएसम्म हामी यसलाई खोल्न सक्दैनौँ।”

आई-८० राजमार्गमा डिसेम्बरदेखि नै भ्वाङहरू देखिन थालेका थिए, जसका कारण राजमार्ग बन्द गरिएको हो। सुरुमा देखा परेको भ्वाङ चारतले भवनको आकार बराबरको थियो र यसलाई मर्मत गर्न चार दिन लागेको थियो। तर, त्यसपछि थप खाली भागहरू फेला परे।

सुरुमा करिब ९० वटा खाली भाग रहेको अनुमान गरिएको थियो, तर मर्मत टोलीहरूले त्यसको झन्डै दोब्बर संख्यामा खाली भागहरू फेला पारेका छन्।

सबैभन्दा पछिल्लो भ्वाङ मार्च १९ मा देखा परेको थियो, जसको आकार १५×१५ फिट रहेको छ। अधिकारीहरूले आशंका गरेका छन् कि यो समस्या पुराना परित्याग गरिएका भूमिगत खानीहरूसँग सम्बन्धित हुन सक्छ।

हाललाई आई-८० पश्चिमतर्फको स्थायित्वबारे कुनै गम्भीर चिन्ता नरहेको बताइएको छ।