ब्रुकलिनको सडक दुर्घटनामा आमा र दुई छोरीको मृत्यु, चार वर्षीय छोरा गम्भीर घाइते
न्यूयोर्क – ब्रुकलिनमा शनिबार दिउँसो भएको एक भयानक सडक दुर्घटनामा एक आमासहित उनका दुई छोरीको मृत्यु भएको छ भने चार वर्षीय छोरा अस्पतालमा जीवन-मृत्युको दोसाँधमा छन्।
न्यूयोर्क प्रहरी विभाग (NYPD) का कमिश्नर जेसिका टिस्चका अनुसार दुर्घटना गराउने ३२ वर्षीय अडी चालकको लाइसेन्स निलम्बित थियो। प्रारम्भिक अनुसन्धानमा उक्त चालकले रातो बत्ती उलंघन गरेको हुनसक्ने आशंका गरिएको छ।
दुर्घटना दिउँसो १ बजे, वर्षकै सबैभन्दा गर्मी दिनमा, मिडवुडको ओसन पार्कवे र क्वेन्टिन रोडमा भएको थियो। प्रहरीका अनुसार ती आमा आफ्ना तीन बच्चासहित जेब्रा क्रसिङ पार गरिरहेकी थिइन्, त्यही बेला चालकले टोयोटा क्याम्रीको पछाडि ठक्कर दिए। ठक्करपछि क्याम्री छेउतिर धकेलियो तर गाडी नियन्त्रण बाहिर गई सोझै जेब्रा क्रसिङमा रहेका आमासहित तीन बच्चालाई ठक्कर दियो।
३५ वर्षीया महिलासहित उनका ६ र ८ वर्षका छोरीको घटनास्थलमै मृत्यु भयो भने ४ वर्षीय छोरा गम्भीर घाइते भएका छन्। उनलाई तत्काल अस्पताल पुर्याइएको छ।
दुर्घटना गराउने चालकको गाडी उल्टिएको थियो, जसबाट उनलाई उद्धार गरी अस्पताल लगिएको छ। उनको अवस्था गम्भीर नभए पनि उपचार भइरहेको प्रहरीले जनाएको छ।
न्यूयोर्कका मेयर एरिक एडम्सले घटनालाई अत्यन्तै दुःखद् भन्दै मृतक परिवारप्रति श्रद्धाञ्जली व्यक्त गरेका छन्। “एक आमा र उनका दुई सन्तानलाई सडक दुर्घटनाले गुमाउनु पर्दा अत्यन्तै पीडादायक छ,” उनले भने।
सडक सुरक्षासँग सम्बन्धित संस्था ‘ट्रान्सपोर्टेसन अल्टरनेटिभ्स’ ले चालकको खराब ट्राफिक रेकर्डलाई लिएर न्यूयोर्कका सांसदहरूलाई कडा कानुन पारित गर्न आग्रह गरेको छ। संगठनका अनुसार दुर्घटना गराउने गाडीमा ९० भन्दा बढी ट्राफिक टिकट थिए, जसमा मात्र अघिल्लो वर्ष १३ वटा स्कुल जोन स्पीडिङ टिकट रहेका थिए।
प्रहरीले प्रारम्भिक ब्रेथ टेस्ट गरी अनुसन्धानलाई अघि बढाएको जनाएको छ भने चालकविरुद्ध कडा कानुनी कारबाही हुने संकेत दिएको छ।
